زندگی بھر کا رونا گانا ہے

زندگی بھر کا رونا گانا ہے

قید خانہ تو قید خانہ ہے

چوک کے نام پر بھی چوک نہیں

کتنا ظالم ترا نشانا ہے

وہ زمانہ بھی کیا زمانا تھا

یہ زمانہ بھی کیا زمانا ہے

جیسے چاہیں سجا کے پیش کریں

آپ ہیں اور غریب خانہ ہے

کیا عجب شرط ہے محبت کی

وقت رخصت بھی مسکرانا ہے

میں ہوں بیمار تم چلے آؤ

اب یہی آخری بہانا ہے

اور کچھ دن خراب کر لو یہیں

پھر تمہیں لوٹ کر بھی آنا ہے

یاد کرنا ہے ایک پل تم کو

اور پھر دیر تک بھلانا ہے

ہاں تعلق ہمیں نے توڑ دیا

اب سبھی کو یہی بتانا ہے