زندگی درد سے معمور ہوئی جاتی ہے

زندگی درد سے معمور ہوئی جاتی ہے

سر خوشی دور بہت دور ہوئی جاتی ہے

دن کو پل بھر میں میسر نہیں سکھ چین مجھے

رات کی نیند بھی کافور ہوئی جاتی ہے

زندگی شام و سحر ٹھوکریں کھاتے کھاتے

زہر غم پینے پہ مجبور ہوئی جاتی ہے

غم و آلام کی ظلمت ہے کچھ اس طرح محیط

زندگی اک شب دیجور ہوئی جاتی ہے

اپنے احباب بھی اب ملتے ہیں بیگانہ صفت

بے رخی دہر کا دستور ہوئی جاتی ہے

مجھ کو دنیا کے رویے پہ تعجب ہے بہت

دل مرا توڑ کے مغرور ہوئی جاتی ہے

کس کے ٹوٹے ہوئے دل کی یہ صدا ہے یارو

انجمن بیخود و مسحور ہوئی جاتی ہے

سوز پنہاں کی جھلک ہے ترے شعروں میں بہارؔ

خوشنوائی تری مشہور ہوئی جاتی ہے