zindagi guzri hai tanha umr-bhar

zindagī guzrī hai tanhā umr-bhar

maiñ rahā mar mar ke zinda umr-bhar

vo kisī kī ho ga.ī manzil to kyā

us kā dekhā maiñ ne rastā umr-bhar

ishq dhokā hai sarāsar bā-ḳhudā

maiñ ne khāyā hai ye dhokā umr-bhar

bhuul hī baiThe ham apne aap ko

bas use hī ham ne sochā umr-bhar

yaad bhī kartā nahīñ huuñ maiñ jinheñ

karte aa.e merā charchā umr-bhar

kah na paa.e baat dil kī aaj tak

mil nahīñ paayā vo tanhā umr-bhar

vo karam kar de to hai us kī razā

kar na paa.e ek sajda umr-bhar

ik sifar hī rah gayā huuñ ab to bas

sab pe maiñ ne ḳhud ko ḳharchā umr-bhar

tere mere meñ hī phañs kar rah ga.e

ho na paayā koī apnā umr-bhar

zindagi guzri hai tanha umr-bhar

main raha mar mar ke zinda umr-bhar

wo kisi ki ho gai manzil to kya

us ka dekha main ne rasta umr-bhar

ishq dhoka hai sarasar ba-KHuda

main ne khaya hai ye dhoka umr-bhar

bhul hi baiThe hum apne aap ko

bas use hi hum ne socha umr-bhar

yaad bhi karta nahin hun main jinhen

karte aae mera charcha umr-bhar

kah na pae baat dil ki aaj tak

mil nahin paya wo tanha umr-bhar

wo karam kar de to hai us ki raza

kar na pae ek sajda umr-bhar

ek sifar hi rah gaya hun ab to bas

sab pe main ne KHud ko KHarcha umr-bhar

tere mere mein hi phans kar rah gae

ho na paya koi apna umr-bhar