zindagi ka hisab bhi to ho

zindagī kā hisāb bhī to ho

koī aisī kitāb bhī to ho

kyā karūñ us ke maiñ savāloñ kā

mo'atabar sā javāb bhī to ho

justujū meñ ho jis kī saarā jahāñ

vo hasīñ intiḳhāb bhī to ho

us se milne to jā rahe ho magar

haath meñ ik gulāb bhī to ho

sab luTā deñge tere kahne par

kuchh mujhe dastiyāb bhī to ho

jis ko piine se maiñ bahak na sakūñ

aisī koī sharāb bhī to ho

jis ko dekhūñ to dekhtā hī rahūñ

husn kā vo shabāb bhī to ho

Dūbne ke liye zarūrī hai

us kī āñkhoñ meñ aab bhī to ho

jis ke khulne se ilm raushan ho

azmatoñ kā vo baab bhī to ho

us ke aiboñ pe Dālne ke liye

ek muTThī 'turāb' bhī to ho

zindagi ka hisab bhi to ho

koi aisi kitab bhi to ho

kya karun us ke main sawalon ka

mo'atabar sa jawab bhi to ho

justuju mein ho jis ki sara jahan

wo hasin intiKHab bhi to ho

us se milne to ja rahe ho magar

hath mein ek gulab bhi to ho

sab luTa denge tere kahne par

kuchh mujhe dastiyab bhi to ho

jis ko pine se main bahak na sakun

aisi koi sharab bhi to ho

jis ko dekhun to dekhta hi rahun

husn ka wo shabab bhi to ho

Dubne ke liye zaruri hai

us ki aankhon mein aab bhi to ho

jis ke khulne se ilm raushan ho

azmaton ka wo bab bhi to ho

us ke aibon pe Dalne ke liye

ek muTThi 'turab' bhi to ho