zindagi ka zaKHm bhar nahin saka

zindagī kā zaḳhm bhar nahīñ sakā

jī rahā huuñ maiñ ki mar nahīñ sakā

baat koī thī ki ban nahīñ sakī

kaam koī thā ki kar nahīñ sakā

ab vahī taraf hai mere chau taraf

jis taraf se maiñ guzar nahīñ sakā

pāniyoñ pe koī pul to thā kahīñ

maiñ hī thā ki paañv dhar nahīñ sakā

rāste ravāñ the mere ḳhuun meñ

maiñ kahīñ qayām kar nahīñ sakā

maiñ pahuñch gayā thā Thiik vaqt par

aur vo intizār kar nahīñ sakā

ek 'umr par bhī 'āftāb' maiñ

apne aap se mukar nahīñ sakā

zindagi ka zaKHm bhar nahin saka

ji raha hun main ki mar nahin saka

baat koi thi ki ban nahin saki

kaam koi tha ki kar nahin saka

ab wahi taraf hai mere chau taraf

jis taraf se main guzar nahin saka

paniyon pe koi pul to tha kahin

main hi tha ki panw dhar nahin saka

raste rawan the mere KHun mein

main kahin qayam kar nahin saka

main pahunch gaya tha Thik waqt par

aur wo intizar kar nahin saka

ek 'umr par bhi 'aftab' main

apne aap se mukar nahin saka