zindagi ki KHwahishon se zindagi rone lagi

zindagī kī ḳhvāhishoñ se zindagī rone lagī

dekh kar hāthoñ ke chhāle muflisī rone lagī

ik ra.īs-e-vaqt ne jab gāliyāñ kaase meñ diiñ

phir faqīr-e-vaqt kī dariyā-dilī rone lagī

aaj jab pahuñchā ujālā andhī āñkhoñ ke huzūr

ġham-zada sūraj huā aur chāñdnī rone lagī

Dūbte sūraj kā manzar is qadar ġhamnāk thā

ki añdheroñ se lipaT kar raushnī rone lagī

kar diyā beTe ne jab mahñge khilaune kā savāl

ek bebas baap kī phir salary rone lagī

muddatoñ ke baa'd jab pahuñchā dayār-e-yār meñ

dekh kar vo ḳhud bhī royā aur galī rone lagī

zindagi ki KHwahishon se zindagi rone lagi

dekh kar hathon ke chhaale muflisi rone lagi

ek rais-e-waqt ne jab galiyan kase mein din

phir faqir-e-waqt ki dariya-dili rone lagi

aaj jab pahuncha ujala andhi aankhon ke huzur

gham-zada suraj hua aur chandni rone lagi

Dubte suraj ka manzar is qadar ghamnak tha

ki andheron se lipaT kar raushni rone lagi

kar diya beTe ne jab mahnge khilaune ka sawal

ek bebas bap ki phir salary rone lagi

muddaton ke ba'd jab pahuncha dayar-e-yar mein

dekh kar wo KHud bhi roya aur gali rone lagi