zindagi marg ki mohlat hi sahi

zindagī marg kī mohlat hī sahī

bahr-e-vāmāñda iqāmat hī sahī

dostī vaj.h-e-adāvat hī sahī

dushmanī bahr-e-rifāqat hī sahī

tuul dete ho adāvat ko kyuuñ

muḳhtasar qissa-e-ulfat hī sahī

rakh kisī vaz.a se ehsān kī ḳhū

mujh ko āzār se rāhat hī sahī

aap kā bhī nahīñ chhuTtā dāman

mere dar pe mirī shāmat hī sahī

āqibat hashr ko aanā ik din

ruuTh jaanā tirī aadat hī sahī

kuchh bhī ai baḳht mayassar hai tujhe

yā tajassus se farāġhat hī sahī

kūcha-e-ġhair meñ chal kar rahiye

gar nahīñ aish to hasrat hī sahī

yahī taqrīb-e-sitam ho ai kaash

har tarah ġhair se nafrat hī sahī

ab to uTh aa.e lahad se be-tāb

na sahī chaal qayāmat hī sahī

yādgārī kī koī baat to ho

maut apnī tirī ruḳhsat hī sahī

adl-o-insāf-e-qayāmat ma.alūm

āh-o-fariyād kī fursat hī sahī

ai 'qalaq' shukr-e-sitam be-jā kyuuñ

āh-o-fariyād kī fursat hī sahī

zindagi marg ki mohlat hi sahi

bahr-e-wamanda iqamat hi sahi

dosti wajh-e-adawat hi sahi

dushmani bahr-e-rifaqat hi sahi

tul dete ho adawat ko kyun

muKHtasar qissa-e-ulfat hi sahi

rakh kisi waza se ehsan ki KHu

mujh ko aazar se rahat hi sahi

aap ka bhi nahin chhuTta daman

mere dar pe meri shamat hi sahi

aaqibat hashr ko aana ek din

ruTh jaana teri aadat hi sahi

kuchh bhi ai baKHt mayassar hai tujhe

ya tajassus se faraghat hi sahi

kucha-e-ghair mein chal kar rahiye

gar nahin aish to hasrat hi sahi

yahi taqrib-e-sitam ho ai kash

har tarah ghair se nafrat hi sahi

ab to uTh aae lahad se be-tab

na sahi chaal qayamat hi sahi

yaadgari ki koi baat to ho

maut apni teri ruKHsat hi sahi

adl-o-insaf-e-qayamat malum

aah-o-fariyaad ki fursat hi sahi

ai 'qalaq' shukr-e-sitam be-ja kyun

aah-o-fariyaad ki fursat hi sahi