zindagi mein rang bharte KHair-o-shar achchhe lage

zindagī meñ rang bharte ḳhair-o-shar achchhe lage

mujh ko is shāḳh-e-junūñ ke sab samar achchhe lage

vaqt kī raftār se takrār meñ thā ik ḳhalā

aur is takrār se ham be-ḳhabar achchhe lage

hijr ho yā vasl sab khāyā piyā aur niiñd lī

saare mausam apne apne vaqt par achchhe lage

aatā jaatā ruuh kā mehmāñ mujhe achchhā lagā

aur use mujh-jism ke dīvār-o-dar achchhe lage

manzileñ achchhī lagīñ to rāstā achchhā lagā

rāstā achchhā lagā to ham-safar achchhe lage

us galī ke moḌ par ik nursery thī phuul the

mujh ko us tak le ke jaate rāhbar achchhe lage

aap ko merā hunar achchhā lagā ho yā nahīñ

mujh ko sab achchhā lagā sab ke hunar achchhe lage

zindagi mein rang bharte KHair-o-shar achchhe lage

mujh ko is shaKH-e-junun ke sab samar achchhe lage

waqt ki raftar se takrar mein tha ek KHala

aur is takrar se hum be-KHabar achchhe lage

hijr ho ya wasl sab khaya piya aur nind li

sare mausam apne apne waqt par achchhe lage

aata jata ruh ka mehman mujhe achchha laga

aur use mujh-jism ke diwar-o-dar achchhe lage

manzilen achchhi lagin to rasta achchha laga

rasta achchha laga to ham-safar achchhe lage

us gali ke moD par ek nursery thi phul the

mujh ko us tak le ke jate rahbar achchhe lage

aap ko mera hunar achchha laga ho ya nahin

mujh ko sab achchha laga sab ke hunar achchhe lage