zindagi teri tamanna mein basar ho jae

zindagī terī tamannā meñ basar ho jaa.e

aur kyā chāhiye jo bār-e-digar ho jaa.e

dard kī dhuup Dhale aas kā mausam nikhre

tere imkān kā paudā jo shajar ho jaa.e

apnī sachchā.ī kā phir mujh ko yaqīñ aa.egā

zīnat-e-dār-o-rasan merā jo sar ho jaa.e

zindagī karne kā aa jaa.e salīqa jo hameñ

sūrat-e-ḳhuld-e-barīñ apnā ye ghar ho jaa.e

mujh ko bas itnā hī sāmān-e-safar kaafī hai

merī manzil hī mirā raḳht-e-safar ho jaa.e

khil uThe phuul kī mānind muqaddar merā

mere mahbūb agar terī nazar ho jaa.e

hāsil-e-zīst vahī merī tamannā hai vahī

vo kisī roz muqaddar kā samar ho jaa.e

ġham-e-duniyā se mile mujh ko rihā.ī ai 'nabīl'

merī aahoñ kā agar us pe asar ho jaa.e

koī dāman na uḌe zard havāoñ se 'nabīl'

gar sahārā jo bashar kā ye bashar ho jaa.e

zindagi teri tamanna mein basar ho jae

aur kya chahiye jo bar-e-digar ho jae

dard ki dhup Dhale aas ka mausam nikhre

tere imkan ka pauda jo shajar ho jae

apni sachchai ka phir mujh ko yaqin aaega

zinat-e-dar-o-rasan mera jo sar ho jae

zindagi karne ka aa jae saliqa jo hamein

surat-e-KHuld-e-barin apna ye ghar ho jae

mujh ko bas itna hi saman-e-safar kafi hai

meri manzil hi mera raKHt-e-safar ho jae

khil uThe phul ki manind muqaddar mera

mere mahbub agar teri nazar ho jae

hasil-e-zist wahi meri tamanna hai wahi

wo kisi roz muqaddar ka samar ho jae

gham-e-duniya se mile mujh ko rihai ai 'nabil'

meri aahon ka agar us pe asar ho jae

koi daman na uDe zard hawaon se 'nabil'

gar sahaara jo bashar ka ye bashar ho jae