zinhaar uski phir koi qimat nahin rahi

zinhār us kī phir koī qīmat nahīñ rahī

jis dil meñ tere ġham kī amānat nahīñ rahī

shāyad kisī ne mujh ko farāmosh kar diyā

aglī sī ab firāq meñ lazzat nahīñ rahī

yā ab nigāh-e-nāz meñ vo garmiyāñ nahīñ

yā dil ko iztirāb kī aadat nahīñ rahī

vo zindagī abas hai na ho jis meñ soz-o-sāz

us dil pe haif jis meñ mohabbat nahīñ rahī

kuchh yuuñ miTā rahī hai mujhe gardish-e-falak

duniyā ko jaise merī zarūrat nahīñ rahī

har lamha un kī yaad rahī monis-e-hayāt

har chand un ko mujh se mohabbat nahīñ rahī

'tālib' pe ab kisī kī nigāh-e-karam nahīñ

shāyad matā-e-ishq kī qīmat nahīñ rahī

zinhaar us ki phir koi qimat nahin rahi

jis dil mein tere gham ki amanat nahin rahi

shayad kisi ne mujh ko faramosh kar diya

agli si ab firaq mein lazzat nahin rahi

ya ab nigah-e-naz mein wo garmiyan nahin

ya dil ko iztirab ki aadat nahin rahi

wo zindagi abas hai na ho jis mein soz-o-saz

us dil pe haif jis mein mohabbat nahin rahi

kuchh yun miTa rahi hai mujhe gardish-e-falak

duniya ko jaise meri zarurat nahin rahi

har lamha un ki yaad rahi monis-e-hayat

har chand un ko mujh se mohabbat nahin rahi

'talib' pe ab kisi ki nigah-e-karam nahin

shayad mata-e-ishq ki qimat nahin rahi