ziyaada ho agar qurbat to rishte TuT jate hain

ziyāda ho agar qurbat to rishte TuuT jaate haiñ

agar puurī na ho hasrat to rishte TuuT jaate haiñ

zarā sā vaqt to māñgā hī kartā hai har ik rishta

agar miltī nahīñ fursat to rishte TuuT jaate haiñ

kabhī qismat se hī bante haiñ duniyā meñ ka.ī rishte

kabhī achchhī na ho qismat to rishte TuuT jaate haiñ

dil-o-jāñ se koī chāhe to us kī qadr bhī karnā

nahīñ doge agar 'izzat to rishte Tuut jaate haiñ

amīroñ se kabhī bāteñ suno bad-hāl rishtoñ kī

ziyāda ho agar daulat to rishte TuuT jaate haiñ

baḌe nāzuk se dhāgoñ se bune jaate haiñ ye yaaro

lagāoge agar tāqat to rishte Tuut jaate haiñ

suno tum ajnabī ban kar hī rahnā siikh lo 'pūnam'

ki baḌh jaatī hai jab chāhat to rishte TuuT jaate haiñ

ziyaada ho agar qurbat to rishte TuT jate hain

agar puri na ho hasrat to rishte TuT jate hain

zara sa waqt to manga hi karta hai har ek rishta

agar milti nahin fursat to rishte TuT jate hain

kabhi qismat se hi bante hain duniya mein kai rishte

kabhi achchhi na ho qismat to rishte TuT jate hain

dil-o-jaan se koi chahe to us ki qadr bhi karna

nahin doge agar 'izzat to rishte Tut jate hain

amiron se kabhi baaten suno bad-haal rishton ki

ziyaada ho agar daulat to rishte TuT jate hain

baDe nazuk se dhagon se bune jate hain ye yaro

lagaoge agar taqat to rishte Tut jate hain

suno tum ajnabi ban kar hi rahna sikh lo 'punam'

ki baDh jati hai jab chahat to rishte TuT jate hain