ظہور یوسف جاں کی نشانیاں ہیں کئی

ظہور یوسف جاں کی نشانیاں ہیں کئی

زبان خلق پہ اڑتی کہانیاں ہیں کئی

ابھی شگفتہ ہے سینے میں آرزو کا چمن

ترے ستم سے ابھی خوش گمانیاں ہیں کئی

اس ایک جور سے دل کس طرح ہو آزردہ

ابھی تو یاد تری مہربانیاں ہیں کئی

جھکی نظر میں ہے نادیدہ جنتوں کی نوید

جواں لبوں پہ مچلتی کہانیاں ہیں کئی

ہوئی شباب میں بس ایک ہی خطا ہم سے

سمجھ لیا تھا کہ ایسی جوانیاں ہیں کئی

گزر تو لے یہ شب ہجر ایک بار اے دل

ترے نصیب میں راتیں سہانیاں ہیں کئی