زلف اس کی مری زنار ہوئی جاتی ہے

زلف اس کی مری زنار ہوئی جاتی ہے

بے خودی اور مزے دار ہوئی جاتی ہے

پڑ گئے چشم ستم گر کے شرارے ہم پر

تاب زخموں کی پر اسرار ہوئی جاتی ہے

شکر ہے ہم کو محبت نے بچائے رکھا

ورنہ یہ دنیا تو بیمار ہوئی جاتی ہے

وحشتوں ہی کی کشاکش کا کرشمہ ہے یہ

روح مٹی کی بھی بیدار ہوئی جاتی ہے

آبلوں نے جو اڑائی ہے ہنسی ظالم کی

دشت کی خاک بھی گلزار ہوئی جاتی ہے

آج پھر اس کی تمناؤں نے آنکھیں کھولیں

آج ویرانی چمن زار ہوئی جاتی ہے

اس ادا سے وہ اتر آیا مری دھڑکن میں

زندگی اپنی طرحدار ہوئی جاتی ہے

عشق نے ایسی بلندی کی اوڑھائی چادر

اب محبت مرا کردار ہوئی جاتی ہے

آہ کی بدلی برستی ہے سر شام ندیمؔ

رات احساس سے سرشار ہوئی جاتی ہے