zulfen khul khul ke giri jati hain KHud shanon par

zulfeñ khul khul ke girī jaatī haiñ ḳhud shānoñ par

aaj vahshat kā alag rang hai dīvānoñ par

baad meñ dekhte haiñ jhiil sī āñkheñ terī

pahle to aa ke nazar Tiktī hai pistānoñ par

koī ilzām tarāshī kī zarūrat na paḌī

ham ne ḳhud haath rakhe apne garebānoñ par

tujh ko mā'lūm nahīñ terī hifāzat ke liye

lā'nteñ kitnī paḌīñ tere nigahbānoñ par

maiñ ne jab dekhā sar-e-tūr tirā sach nahīñ hai

tab taras aayā tirī diid ke hairānoñ par

shaam ke vaqt jahāñ bhar ke satā.e darvesh

ek parcham ke tale milte haiñ mai-ḳhānoñ par

ham ne har roz na.e shahr kī miTTī Daalī

zindagī baḳhshne vaale tire ehsānoñ par

zulfen khul khul ke giri jati hain KHud shanon par

aaj wahshat ka alag rang hai diwanon par

baad mein dekhte hain jhil si aankhen teri

pahle to aa ke nazar Tikti hai pistanon par

koi ilzam tarashi ki zarurat na paDi

hum ne KHud hath rakhe apne garebanon par

tujh ko ma'lum nahin teri hifazat ke liye

la'nten kitni paDin tere nigahbanon par

main ne jab dekha sar-e-tur tera sach nahin hai

tab taras aaya teri did ke hairanon par

sham ke waqt jahan bhar ke satae darwesh

ek parcham ke tale milte hain mai-KHanon par

hum ne har roz nae shahr ki miTTi Dali

zindagi baKHshne wale tere ehsanon par