zulm ki jo bhi mazammat nahin karne wale

zulm kī jo bhī mazammat nahīñ karne vaale

aise logoñ kī ham 'izzat nahīñ karne vaale

saath le aa.egī phir se koī bint-e-havvā

is liye ḳhvāhish-e-jannat nahīñ karne vaale

āḳhirī saañs talak Tuut ke chāheñge tumheñ

'ishq ham hasb-e-zarūrat nahīñ karne vaale

'ishq meñ terī jagah aur kisī ko de kar

ham amānat meñ ḳhayānat nahīñ karne vaale

ḳhvāb āñkhoñ ke jinheñ sauñp diye haiñ tum ne

vo to ḳhvāboñ kī hifāzat nahīñ karne vaale

ham se 'āfī' jo milo milnā ḳhulūs-e-dil se

ham munāfiq kī to 'izzat nahīñ karne vaale

zulm ki jo bhi mazammat nahin karne wale

aise logon ki hum 'izzat nahin karne wale

sath le aaegi phir se koi bint-e-hawwa

is liye KHwahish-e-jannat nahin karne wale

aaKHiri sans talak Tut ke chahenge tumhein

'ishq hum hasb-e-zarurat nahin karne wale

'ishq mein teri jagah aur kisi ko de kar

hum amanat mein KHayanat nahin karne wale

KHwab aankhon ke jinhen saunp diye hain tum ne

wo to KHwabon ki hifazat nahin karne wale

hum se 'afi' jo milo milna KHulus-e-dil se

hum munafiq ki to 'izzat nahin karne wale