آسماں تیرا زمیں تیری ہے تیری کائنات

آسماں تیرا زمیں تیری ہے تیری کائنات

حکمراں ہے تو ہے تیری حکمرانی شش جہات

کوئی زیبائی میں ہمسر ہو نہیں سکتا ترا

زیب دیتے ہیں تجھی کو حسن کے سارے صفات

نور ہے تیرا ہی جس سے تیرگی کا سینہ چاک

تجھ ہی سے نشو و نما پاتی ہے دنیا میں حیات

مشتقوں کے درمیاں بس ایک ہی مصدر ہے تو

سب عرض ہیں اور جوہر ہے فقط اک تیری ذات

منکشف ہیں تجھ پہ اسرار و رموز جزو و کل

آئنہ ہیں تیری نظروں میں جہاں کے سب نکات

برتر و بالا ہے تو وہم و گماں سے بھی مرے

ہے کسے جرأت کہ لائے بھی زباں پر تیری بات