ترانۂ_حمد

کلمہ پڑھتا ہے ہر اک مرغ خوش الحاں تیرا

یہ گلستان جہاں ہے کہ دبستاں تیرا

یارب اس بندۂ عاصی پہ یہ احساں تیرا

ساری دنیا پہ ہے چھایا ہوا انساں تیرا

دل کی آنکھیں جو کھلیں کھل گئے اسرار جہاں

اک طلسمات ہے یہ عالم امکاں تیرا

ذرہ ذرہ ہے تری شان خدائی کا ثبوت

قطرہ قطرہ ہے عجب گوہر عرفاں تیرا

ہے یہ وہ گل کدۂ دہر کہ یارب اس میں

پتا پتا نظر آتا ہے ثنا خواں تیرا

ہر کلی حسن تبسم سے تری شکر گزار

اور مرہون کرم ہر گل خنداں تیرا

سبزہ و گل نظر افروز رواں ہیں نہریں

کم گلستاں سے نہیں کوئی بیاباں تیرا

ظلمت شب میں لبھاتے ہیں دلوں کو انجم

کتنا پیارا ہے یہ آئین چراغاں تیرا

بزم ہستی کو جو دیتا ہے اجالا ہر روز

اک چراغ ایسا ہے یہ مہر درخشاں تیرا

اک نظر محویؔٔ ناشاد پہ بھی ہو جائے

کہ یہ بندہ ہے پریشان و پشیماں تیرا