شور کی اس بھیڑ میں خاموش تنہائی سی تم

شور کی اس بھیڑ میں خاموش تنہائی سی تم

زندگی ہے دھوپ، تو مد مست پروائی سی تم

آج میں بارش میں جب بھیگا تو تم ظاہر ہوئیں

جانے کب سے رہ رہی تھیں مجھ میں انگڑائی سی تم

چاہے محفل میں رہوں چاہے اکیلے میں رہوں

گونجتی رہتی ہو مجھ میں شوخ شہنائی سی تم

لاؤ وہ تصویر جس میں پیار سے بیٹھے ہیں ہم

میں ہوں کچھ سہما ہوا سا، اور شرمائی سی تم

میں اگر موتی نہیں بنتا تو کیا بنتا کنورؔ

ہو مرے چاروں طرف ساگر کی گہرائی سی تم