یہی آواز کا موسم ہے نہ ٹالو مجھ کو

یہی آواز کا موسم ہے نہ ٹالو مجھ کو

کچھ جوابوں سے نپٹنے دو سوالو مجھ کو

میں کھرا سکہ ہوں جب چاہے چلا لو مجھ کو

سر بازار نہ رہ رہ کے اچھالو مجھ کو

آئنے آج کی تہذیب کے سب پتھر ہیں

پھر سے ڈھونڈو مرے ماضی کے حوالو مجھ کو

میں نہ آغاز نہ انجام نہ پیکر کا اسیر

جانتے ہی نہیں تم جاننے والو مجھ کو

کوئی تو حق ہے اندھیروں کا بھی مجھ پر آخر

پھر کسی سوچ میں ڈھلنے دو اجالو مجھ کو

غم آفاق سے نپٹوں تو میں خود کی سوچوں

اپنا احساس کہاں چاہنے والو مجھ کو

میرا کیا ہے میں تو احساس کی لو ہوں تنہاؔ

جی میں جب آئے بجھا لو کہ جگا لو مجھ کو