aaKHiri gali

phir vahī chheḌīñ pyaar kī bāteñ aap nahīñ baaz ā.eñge

dekhiye ham uTh kar chal deñge aap nahīñ gar jā.eñge

qaus-e-quzah chūlhe meñ jaa.e kaalī ghaTā ko aag lage

kyā ham dekh nahīñ sakte haiñ aap hameñ dikhlā.eñge

āñkheñ hamārī achchhī haiñ to aap ko in se kyā matlab

jaisī bhī haiñ aap ab in ke pīchhe hī paḌ jā.eñge?

burī burī nazreñ chehre par Daal rahe haiñ uf tauba

ham apne donoñ gāloñ ko jā ke abhī dho ā.eñge

itne lambe lambe ḳhat ham kaise paḌheñ hā.e-allāh

jab bhī ā.eñge saath apne koī musībat lā.eñge

ham par aap ne nazmeñ likh diiñ is pe bhī ham ḳhāmosh rahe

nazmoñ ke baad aap to ham par nasr bhī ab chipkā.eñge

ye jhumke, ye senT, ye nazmeñ ishq kā sab sāz-o-sāmāñ

ab vāpas le jā.iye sāhab bas meñ nahīñ ham ā.eñge

ham kahte haiñ shahr meñ hoñgī nau so laḌkiyāñ kam-se-kam

ye kyā zid hai pyaar kī maalā ham hī ko pahnā.eñge

kar liije 'raziya' se mohabbat ham par kiije nazr-e-karam

vo be-chārī phañs jā.egī ham us ko samjhā.eñge

azmat bhī achchhī-ḳhāsī hai us se laḌā liije āñkheñ

aap is bandī kī ḳhātir kab tak zahmat farmā.eñge

'ḳhālid' sāhab aate haiñ to kaise kaheñ ham mat aao

aate haiñ to ham kyuuñ rokeñ khā to nahīñ vo jā.eñge

dekhiye haath lagāyā to ham Dar kar shor machā deñge

ammī abbā phupphū, ḳhāla dauḌ ke sab aa jā.eñge

pahle ham ko bahan kahā ab fikr hamīñ se shādī kī

ye bhī na sochā bahan se shādī kar ke kyā kahlā.eñge

phir wahi chheDin pyar ki baaten aap nahin baz aaenge

dekhiye hum uTh kar chal denge aap nahin gar jaenge

qaus-e-quzah chulhe mein jae kali ghaTa ko aag lage

kya hum dekh nahin sakte hain aap hamein dikhlaenge

aankhen hamari achchhi hain to aap ko in se kya matlab

jaisi bhi hain aap ab in ke pichhe hi paD jaenge?

buri buri nazren chehre par Dal rahe hain uf tauba

hum apne donon galon ko ja ke abhi dho aaenge

itne lambe lambe KHat hum kaise paDhen hae-allah

jab bhi aaenge sath apne koi musibat laenge

hum par aap ne nazmen likh din is pe bhi hum KHamosh rahe

nazmon ke baad aap to hum par nasr bhi ab chipkaenge

ye jhumke, ye senT, ye nazmen ishq ka sab saz-o-saman

ab wapas le jaiye sahab bas mein nahin hum aaenge

hum kahte hain shahr mein hongi nau so laDkiyan kam-se-kam

ye kya zid hai pyar ki mala hum hi ko pahnaenge

kar lije 'raziya' se mohabbat hum par kije nazr-e-karam

wo be-chaari phans jaegi hum us ko samjhaenge

azmat bhi achchhi-KHasi hai us se laDa lije aankhen

aap is bandi ki KHatir kab tak zahmat farmaenge

'KHalid' sahab aate hain to kaise kahen hum mat aao

aate hain to hum kyun roken kha to nahin wo jaenge

dekhiye hath lagaya to hum Dar kar shor macha denge

ammi abba phupphu, KHala dauD ke sab aa jaenge

pahle hum ko bahan kaha ab fikr hamin se shadi ki

ye bhi na socha bahan se shadi kar ke kya kahlaenge