be-chaari

mire shauhar ko samjhāo ye ghar meñ ġham banātā hai

qalam kī nok se lafzoñ ke atom bam banātā hai

na.ī bahroñ meñ ye misroñ ke pech-o-ḳham banātā hai

ye ġhazleñ an-ginat likhtā hai bachche kam banātā hai

is international shā.ir meñ dariyā kī ravānī hai

dubai Los-angeles london tak is ne ḳhaak chhānī hai

ajab PR hai aksar samundar paar rahtā hai

ġhazal chāhe adhūrī ho ticket tayyār rahtā hai

hamesha nāshte meñ fikr-angezī kā baiza hai

mujhe shauhar kī chāhat hai ise shohrat kā haiza hai

ba-qaul us ke sharīk-e-zindagī bad-zauq hai us kā

nizāmat shauq hai is kā sadārat tauq hai is kā

ḳhudī kā jaam raas aatā nahīñ hāthoñ meñ loTā hai

mire shauhar kā qad 'iqbāl' se thoḌā hī chhoTā hai

ġhazal kahtā hai DaT ke masnavī bil-azm kahtā hai

dimāġh is kā ulaT jaa.e to nasrī nazm kahtā hai

ye jab ġharq-e-suḳhan hogā ḳhamoshī farz kar degā

agar phir bhī koī bole to matl.a arz kar degā

na.e uslūb kī har shā.era se is kā naatā hai

mirī chāhat ke lahje meñ shutur-gurba batātā hai

pasand aatī hai urdu kī har ik champā kalī is ko

magar mujh meñ nazar aatā hai ītā-e-jalī is ko

mire abbā ne is ko daad dī nāzuk-ḳhayālī kī

mirī ammāñ ko kahtā hai musaddas hai ye 'hālī' kī

ye bachchoñ ko bulātā hai ba-andāz-e-suḳhan-dānī

kahāñ hai misra-e-ūlā kahāñ hai misra-e-sānī

ġhurūr-e-shauharī bilkul nahīñ bas sher kahtā hai

ye mere sāmne bhī zo.am-e-ustādī meñ rahtā hai

maiñ kahtī huuñ hamāre pyaar kā hāsil hai ḳhatre meñ

ye kahtā hai nahīñ urdu kā mustaqbil hai ḳhatre meñ

kabhī angūr thī ab ḳhushk meva ho ga.ī huuñ maiñ

mirā shauhar hai zinda aur beva ho ga.ī huuñ maiñ

mere shauhar ko samjhao ye ghar mein gham banata hai

qalam ki nok se lafzon ke atom bam banata hai

nai bahron mein ye misron ke pech-o-KHam banata hai

ye ghazlen an-ginat likhta hai bachche kam banata hai

is international shair mein dariya ki rawani hai

dubai Los-angeles london tak is ne KHak chhani hai

ajab PR hai aksar samundar par rahta hai

ghazal chahe adhuri ho ticket tayyar rahta hai

hamesha nashte mein fikr-angezi ka baiza hai

mujhe shauhar ki chahat hai ise shohrat ka haiza hai

ba-qaul us ke sharik-e-zindagi bad-zauq hai us ka

nizamat shauq hai is ka sadarat tauq hai is ka

KHudi ka jam ras aata nahin hathon mein loTa hai

mere shauhar ka qad 'iqbaal' se thoDa hi chhoTa hai

ghazal kahta hai DaT ke masnawi bil-azm kahta hai

dimagh is ka ulaT jae to nasri nazm kahta hai

ye jab gharq-e-suKHan hoga KHamoshi farz kar dega

agar phir bhi koi bole to matla arz kar dega

nae uslub ki har shaera se is ka nata hai

meri chahat ke lahje mein shutur-gurba batata hai

pasand aati hai urdu ki har ek champa kali is ko

magar mujh mein nazar aata hai ita-e-jali is ko

mere abba ne is ko dad di nazuk-KHayali ki

meri amman ko kahta hai musaddas hai ye 'haali' ki

ye bachchon ko bulata hai ba-andaz-e-suKHan-dani

kahan hai misra-e-ula kahan hai misra-e-sani

ghurur-e-shauhari bilkul nahin bas sher kahta hai

ye mere samne bhi zoam-e-ustadi mein rahta hai

main kahti hun hamare pyar ka hasil hai KHatre mein

ye kahta hai nahin urdu ka mustaqbil hai KHatre mein

kabhi angur thi ab KHushk mewa ho gai hun main

mera shauhar hai zinda aur bewa ho gai hun main