hai ab to hasinaon ka halqa mere aage

hai ab to hasīnāoñ kā halqa mire aage

salmā mire pīchhe hai zuleḳhā mire aage

ab bach ke kahāñ jaa.e har ik samt hai dīvār

biivī mire pīchhe hai to bachcha mire aage

be-parda vo college meñ to phirtī haiñ barābar

oḌhā mirī mahbūb ne burqa mire aage

maiñ ab ke election meñ gañvā baiThā zamānat

Duubā mirī qismat kā sitāra mire aage

baḌhne kī tamannā ho to mujh jaise bano tum

kahne lagā sāhab kā ye chamcha mire aage

das bachchoñ ke abbā haiñ magar hai yahī ḳhvāhish

har vaqt hī baiThī rahe lailā mire aage

ab vo bhī to kahne lage mujh ko 'nazar' uncle

niklā hai murādoñ kā janāza mire aage

hai ab to hasinaon ka halqa mere aage

salma mere pichhe hai zuleKHa mere aage

ab bach ke kahan jae har ek samt hai diwar

biwi mere pichhe hai to bachcha mere aage

be-parda wo college mein to phirti hain barabar

oDha meri mahbub ne burqa mere aage

main ab ke election mein ganwa baiTha zamanat

Duba meri qismat ka sitara mere aage

baDhne ki tamanna ho to mujh jaise bano tum

kahne laga sahab ka ye chamcha mere aage

das bachchon ke abba hain magar hai yahi KHwahish

har waqt hi baiThi rahe laila mere aage

ab wo bhi to kahne lage mujh ko 'nazar' uncle

nikla hai muradon ka janaza mere aage