ishq jab se ho gayā ik lakhnavī ḳhātūn se
dil kī bāteñ roz hī kartā huuñ telephone se
jo ġhalāzat dil meñ hai vo duur hogī kis tarah
gandagī to jism kī dhote ho tum sābūn se
shervānī aur Topī jaa.eñ chūlhe-bhāḌ meñ
ab to raġhbat hai mujhe bas coat se patlūn se
pople muñh se chane khānā nahīñ mumkin huzūr
aa nahīñ saktī javānī lauT ke mājūn se
nāqid-e-āzam huuñ muulī par likhūñ mazmūn agar
baat kā āġhāz kartā huuñ maiñ aflātūn se
ek hī sūrat meñ ghar kī puurī hoñ farmā.isheñ
ḳhāndānī silsila miltā ho gar qārūn se
is zamāne kī ajab tishna-labī hai ai 'zafar'
pyaas us kī sirf bujhtī hai hamāre ḳhuun se
ishq jab se ho gaya ek lakhnawi KHatun se
dil ki baaten roz hi karta hun telephone se
jo ghalazat dil mein hai wo dur hogi kis tarah
gandagi to jism ki dhote ho tum sabun se
sherwani aur Topi jaen chulhe-bhaD mein
ab to raghbat hai mujhe bas coat se patlun se
pople munh se chane khana nahin mumkin huzur
aa nahin sakti jawani lauT ke majun se
naqid-e-azam hun muli par likhun mazmun agar
baat ka aaghaz karta hun main aflatun se
ek hi surat mein ghar ki puri hon farmaishen
KHandani silsila milta ho gar qarun se
is zamane ki ajab tishna-labi hai ai 'zafar'
pyas us ki sirf bujhti hai hamare KHun se
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.
