عشق کا پرچہ

دلاور فگار

عشق کا پرچہ

دلاور فگار

MORE BYدلاور فگار

    محو حیرت ہوں کہ وہ سیٹر تھا کتنا با کمال

    عشق کے بارے میں پوچھا جس نے پرچہ میں سوال

    ایسے ہی سیٹر اگر دو چار پیدا ہو گئے

    دیکھنا اس ملک میں فن کار پیدا ہو گئے

    عام ہوگی عاشقی کالج کے عرض و طول میں

    لیلیٰ و مجنوں نظر آئیں گے اب اسکول میں

    عشق کے آداب لڑکوں کو سکھائے جائیں گے

    غیر عاشق جو ہیں وہ عاشق بنائے جائیں گے

    عاشقوں کو علم میں پرفیکٹ سمجھا جائے گا

    عشق اک کمپلسری سبجیکٹ سمجھا جائے گا

    امتحاں ہوگا تو پوچھے جائیں گے ایسے سوال

    اپنی محبوبہ کے بارے میں کچھ اظہار خیال

    عشق اک سائنس ہے یا آرٹ سمجھا کر لکھو

    یا یہ دونوں عشق کا ہیں پارٹ سمجھا کر لکھو

    آج اپنے ملک میں عاشق ہیں کتنے فیصدی

    منتہی ان میں ہیں کتنے اور کتنے مبتدی

    کیا تعلق طب یونانی کو ہے رومان سے

    کمپیئر فرہاد و مجنوں کو کرو لقمان سے

    عشق کتنے قسم کا ہوتا ہے لکھو با وثوق

    فی زمانہ کیا ہیں عاشق کے فرائض اور حقوق

    ایک تحقیقی مقالہ لکھ کے سمجھاؤ یہ بات

    شاخ آہو پر ہی کیوں رہتی ہے عاشق کی برات

    کچھ مثالیں دے کے سمجھاؤ یہ قول مستند

    عشق اول در دل معشوق پیدا می شود

    سر کو کیا نسبت ہے سنگ آستان یار سے

    تم نے سر پھوڑا کبھی معشوق کی دیوار سے

    کیا سکوں ملتا ہے دل کو آہ شعلہ بار سے

    گرم نالے عرش پر جاتے ہیں کس رفتار سے

    اپنے اندازے سے طول شام تنہائی بتاؤ

    صرف تخمیناً شب ہجراں کی لمبائی بتاؤ

    انڈیا کا ایک نقشہ اپنی کاپی پر بناؤ

    اور پھر اس میں حدود کوچۂ جاناں دکھاؤ

    وصل کی درخواست پر کس کی سفارش چاہیے

    عشق کے پودے کو کتنے انچ بارش چاہیے

    اپنی محبوبہ کو اک درخواست انگلش میں لکھو

    اس سے یہ پوچھو جواب آرزو یس ہے کہ نو

    کون سے آلے سے دیکھیں حسن جانانہ لکھو

    حسن کی مقدار جو ناپے وہ پیمانہ لکھو

    مادر لیلیٰ نے تو لیلیٰ نہ بیاہی قیس کو

    تم اگر لیلیٰ کی ماں ہوتے تو کیا کرتے لکھو

    ایک عاشق تین دن میں چلتا ہے انیس میل

    تین عاشق کتنے دن میں جائیں گے اڑتیس میل

    آپ کر سکتے ہیں ان میں سے کوئی بارہ سوال

    بد خطی کے پانچ نمبر ہیں رہے یہ بھی خیال

    ویڈیو
    This video is playing from YouTube

    Videos
    This video is playing from YouTube

    دلاور فگار

    دلاور فگار

    مأخذ :
    • کتاب : Kulliyat Dilawar Figar (Pg. 86)

    موضوعات

    Additional information available

    Click on the INTERESTING button to view additional information associated with this sher.

    OKAY

    About this sher

    Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.

    Close

    rare Unpublished content

    This ghazal contains ashaar not published in the public domain. These are marked by a red line on the left.

    OKAY

    Jashn-e-Rekhta | 2-3-4 December 2022 - Major Dhyan Chand National Stadium, Near India Gate, New Delhi

    GET YOUR FREE PASS
    بولیے