jab ki maazī se bahut past bhī haal achchhā hai
phir to mustaqbil-e-rañgīñ kā ḳhayāl achchhā hai
jis kā jo zauq ho us ko vahī aatā hai pasand
maiñ to kahtā huuñ ki donoñ kā ḳhayāl achchhā hai
kuchh election meñ to kuchh naam pe 'ġhālib' ke kamāo
ik barahman ne kahā hai ki ye saal achchhā hai
chāra-gar kahte haiñ bas maut kī baaqī hai kasar
aur har tarah se bīmār kā haal achchhā hai
nahīñ ma.alūm agar saañp kā mantar to na phañs
haath us saañp kī bāñbī meñ na Daal achchhā hai
jo bhī hāregā vahī gāliyāñ degā us ko
jis barahman ne kahā hai ki ye saal achchhā hai
DhūñDiye ḳhair se jā kar koī moTī sasurāl
haath jo muft meñ aa.e to vo maal achchhā hai
bain hī bain guzarte raho is vaadī se
na harām achchhā hai bilkul na halāl achchhā hai
ek ham the jo siyāsat meñ kamā paa.e na kuchh
varna maazī ke faqīroñ kā bhī haal achchhā hai
jitne haiñ dahr meñ hāthoñ kī safā.ī ke kamāl
sab se ai dost girah-kaT kā kamāl achchhā hai
jis kī bachpan hī meñ shādī ho vo kiyā jaane ġharīb
ishq meñ hijr hai behtar ki visāl achchhā hai
aur to kuchh bhī nahīñ hazrat-e-'māchis' lekin
aap meñ aag lagāne kā kamāl achchhā hai
jab ki mazi se bahut past bhi haal achchha hai
phir to mustaqbil-e-rangin ka KHayal achchha hai
jis ka jo zauq ho us ko wahi aata hai pasand
main to kahta hun ki donon ka KHayal achchha hai
kuchh election mein to kuchh nam pe 'ghaalib' ke kamao
ek barahman ne kaha hai ki ye sal achchha hai
chaara-gar kahte hain bas maut ki baqi hai kasar
aur har tarah se bimar ka haal achchha hai
nahin malum agar sanp ka mantar to na phans
hath us sanp ki banbi mein na Dal achchha hai
jo bhi haarega wahi galiyan dega us ko
jis barahman ne kaha hai ki ye sal achchha hai
DhunDiye KHair se ja kar koi moTi sasural
hath jo muft mein aae to wo mal achchha hai
bain hi bain guzarte raho is wadi se
na haram achchha hai bilkul na halal achchha hai
ek hum the jo siyasat mein kama pae na kuchh
warna mazi ke faqiron ka bhi haal achchha hai
jitne hain dahr mein hathon ki safai ke kamal
sab se ai dost girah-kaT ka kamal achchha hai
jis ki bachpan hi mein shadi ho wo kiya jaane gharib
ishq mein hijr hai behtar ki visal achchha hai
aur to kuchh bhi nahin hazrat-e-'machis' lekin
aap mein aag lagane ka kamal achchha hai
Source:
Intikhab-e-Kalam-e-Machis Lakhnawi (Pg. ebook-33 page-32)
-
- Edition: 2004
- Publisher: Uttar Pradesh Urdu Academy, Lucknow
- Year of Publication: 2004
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.