maghz-e-shaer

ik roz doctor se ye maiñ ne kahā janāb

muddat se kah rahā huuñ maiñ nazmeñ bahut ḳharāb

check kar ke merī khopaḌī kahne lagā huzūr

bheje meñ ghus gayā hai koī aap ke futūr

bolā badalnā hogā ye bhejā huzūr kā

bas hai yahī ilaaj dimāġhī futūr kā

maiñ ne kahā dimāġh kahāñ aur kahāñ haqīr

bolā ki daan māñgiye phir dekhiye sharīr

maiñ ne kahā ki aisā hī vaisā chalegā kyā

bolā ki shā.irāna ho kiiḌā dimāġh kā

pahle to ek shā.er-e-āzam se maiñ milā

barbādī-e-dimāġh kā un se kiyā gilā

maiñ ne kahā ki mujh pe karam kījiye janāb

thoḌā sā maġhz mujh ko ināyat kareñ shitāb

bole hamārā baiTh ke bhejā na khā.iye

uḌiye yahāñ se aur kahīñ siiTī bajā.iye

urdu adab meñ jo bhī hamārā maqām hai

ustād-e-mohtaram ke vo bheje kā kaam hai

mahrūm-e-maġhz ek dukāñ par ga.e jo ham

aa.e nazar dukān pe bheje ka.ī baham

kuchh sar-phire dimāġh hasīñ laḌkiyoñ ke the

bak bak jo kar rahe the vo sab bīviyoñ ke the

england kā dimāġh koī qāhira kā thā

chuġhlī jo kar rahā thā kisī shā.era kā thā

āshiq-mizāj kaam na le kar brain se

bheje laḌā rahe the har ik ain-ġhain se

faulād ke qafas meñ vo saare asiir the

bheje fasādiyoñ ke vahāñ par kasīr the

maiñ ne kahā brain koī āshiqāna de

jaldī se ik dimāġh mujhe shā.irāna de

dikhlā ke ik dimāġh vo kahne lagā janāb

rag rag meñ haiñ phañse hue ash.ār be-hisāb

bhejā mahak rahā hai zamāne kī daad se

labrez hai dimāġh ġhazal ke mavād se

maiñ ne kahā ye makkhiyāñ kyuuñ bhin-bhinā.e haiñ

bolā na.ī ġhazal pe na.ī dhun biThā.e haiñ

maiñ ne kahā ki daam batā.eñ mujhe shitāb

bolā dimāġh Thiik hai aur daam haiñ ḳharāb

bheje mirī dukān pe sab ānā-pā.ī haiñ

shā.er ke bas dimāġh ke paise bhī high haiñ

maiñ ne kahā ki khol de ye raaz tū nihāñ

shā.er ke kyuuñ dimāġh ke paise kiye girāñ

bolā kabhī-kabhār ye biktā hai kyā kareñ

sau phoḌiye to ek nikaltā hai kyā kareñ

ek roz doctor se ye main ne kaha janab

muddat se kah raha hun main nazmen bahut KHarab

check kar ke meri khopaDi kahne laga huzur

bheje mein ghus gaya hai koi aap ke futur

bola badalna hoga ye bheja huzur ka

bas hai yahi ilaj dimaghi futur ka

main ne kaha dimagh kahan aur kahan haqir

bola ki dan mangiye phir dekhiye sharir

main ne kaha ki aisa hi waisa chalega kya

bola ki shairana ho kiDa dimagh ka

pahle to ek shaer-e-azam se main mila

barbaadi-e-dimagh ka un se kiya gila

main ne kaha ki mujh pe karam kijiye janab

thoDa sa maghz mujh ko inayat karen shitab

bole hamara baiTh ke bheja na khaiye

uDiye yahan se aur kahin siTi bajaiye

urdu adab mein jo bhi hamara maqam hai

ustad-e-mohtaram ke wo bheje ka kaam hai

mahrum-e-maghz ek dukan par gae jo hum

aae nazar dukan pe bheje kai baham

kuchh sar-phire dimagh hasin laDkiyon ke the

bak bak jo kar rahe the wo sab biwiyon ke the

england ka dimagh koi qahira ka tha

chughli jo kar raha tha kisi shaera ka tha

aashiq-mizaj kaam na le kar brain se

bheje laDa rahe the har ek ain-ghain se

faulad ke qafas mein wo sare asir the

bheje fasadiyon ke wahan par kasir the

main ne kaha brain koi aashiqana de

jaldi se ek dimagh mujhe shairana de

dikhla ke ek dimagh wo kahne laga janab

rag rag mein hain phanse hue ashaar be-hisab

bheja mahak raha hai zamane ki dad se

labrez hai dimagh ghazal ke mawad se

main ne kaha ye makkhiyan kyun bhin-bhinae hain

bola nai ghazal pe nai dhun biThae hain

main ne kaha ki dam bataen mujhe shitab

bola dimagh Thik hai aur dam hain KHarab

bheje meri dukan pe sab aana-pai hain

shaer ke bas dimagh ke paise bhi high hain

main ne kaha ki khol de ye raaz tu nihan

shaer ke kyun dimagh ke paise kiye giran

bola kabhi-kabhaar ye bikta hai kya karen

sau phoDiye to ek nikalta hai kya karen