mard-e-musalman jadid

is vaqt hai momin kī na.ī shaan na.ī aan

kirdār meñ guftār meñ shaitān hai shaitān

be-kārī riyā-kārī jahāñ-dāri-o-jabrūt

in chaar 'anāsir kā murakkab hai musalmān

ham-sāya-e-iblīs-e-la’īñ lāl-bujhakkaḌ

jab chāhe badal detā hai ye mā’nī-e-qur.ān

is raaz ko ab bhuul gayā hai ye machhandar

kyā chiiz hai insāñ ke liye quvvat-e-īmān

qudrat ke maqāsid ke ḳhilāf is ke irāde

duniyā meñ pareshān hai 'uqbā meñ pashemān

jis se ki dhaḌak jaa.e zamāna vo kaḌak bam

shaitānoñ ke dil jis se dahal jaa.eñ vo tūfān

har qaul-o-'amal is kā hai qur.ān muḳhālif

auroñ ko sunātā hai ye allāh kā farmān

apnoñ se har ik jang meñ ban jaatā hai ġhāzī

ġhairoñ ko faqat dekh ke ho jaatā hai be-jān

raT.tā hai ki duniyā pe rahī merī hukūmat

sochā na kabhī kaise banā jaatā hai sultān

sab qā’r-e-muzillat meñ gire jaate haiñ dhaḌ dhaḌ

vo shaiḳh hoñ sayyad hoñ ki mirzā hoñ ki afġhān

maz.hab se shujā'at se qayādat se hai nafrat

ye baat agar sach hai to allāh nigahbān

likhtā hai tire kār-e-siyah-tāb ko 'asrār'

le ab tire kirdār kī ye bhī huī pahchān

is waqt hai momin ki nai shan nai aan

kirdar mein guftar mein shaitan hai shaitan

be-kari riya-kari jahan-dari-o-jabrut

in chaar 'anasir ka murakkab hai musalman

ham-saya-e-iblis-e-la’in lal-bujhakkaD

jab chahe badal deta hai ye ma’ni-e-quran

is raaz ko ab bhul gaya hai ye machhandar

kya chiz hai insan ke liye quwwat-e-iman

qudrat ke maqasid ke KHilaf is ke irade

duniya mein pareshan hai 'uqba mein pasheman

jis se ki dhaDak jae zamana wo kaDak bam

shaitanon ke dil jis se dahal jaen wo tufan

har qaul-o-'amal is ka hai quran muKHalif

auron ko sunata hai ye allah ka farman

apnon se har ek jang mein ban jata hai ghazi

ghairon ko faqat dekh ke ho jata hai be-jaan

raTta hai ki duniya pe rahi meri hukumat

socha na kabhi kaise bana jata hai sultan

sab qa’r-e-muzillat mein gire jate hain dhaD dhaD

wo shaiKH hon sayyad hon ki mirza hon ki afghan

mazhab se shuja'at se qayaadat se hai nafrat

ye baat agar sach hai to allah nigahban

likhta hai tere kar-e-siyah-tab ko 'asrar'

le ab tere kirdar ki ye bhi hui pahchan