udhaar

ham ko mulāzmat jo khaḌe ghaaT mil ga.ī

bāchhoñ kī naav kānoñ ke sāhil se jā lagī

chiTThī phir un ko ham ne ba-sad-shauq yuuñ likhī

''āyā karo idhar bhī marī jaañ kabhī kabhī''

dil ne kahā ki jhuum ke naare lagā.iye

taḳhtī lagā ke piiTh se ab ghuum jā.iye

aa jā.iye to mil ke mahājan ko luuT leñ

qarzā vo leñ ki asl kabhī deñ na suud deñ

vo qarz phir liye haiñ ki allāh kī panāh!

ruupe usī se leñ mirī jis par paḌī nigāh

phir us ke bhāgne kī bhī chhoḌī na koī raah

sab ke lañgoTī bañdh ga.ii, hālat huī tabāh

yaarā na thā fuġhāñ kaa, na mauqā thā aah kā

pittā phaTā huā thā har ek qarz-ḳhvāh kā

qarze pe ham ne ek makān aisā le liyā

jis meñ ki do taraf se thā jaane kā rāsta

jab saare qarz-ḳhvāhoñ ko is kā pata chalā

har fard le ke apnā bahī-khātā aa gayā

thā har taraf se shor ki tashrīf lā.iye

sannāTā kah rahā thā ki DanDe bajā.iye

pahlī jo aa.ī ek qayāmat machā ga.ī

bil le ke qarz-ḳhvāhoñ kī ik fauj aa ga.ī

har qarz-ḳhvāh hadd-e-adab lāñgne lagā

dil apnī maġhfirat kī duā māñgne lagā

har samt laad laad ke girne lage jo bam

garmāyā dil to aayā tabī.at meñ pech-o-ḳham

rah rah ke apnī boTiyāñ ham nochne lage

aur ḳhud-kushī kī raah na.ī sochne lage

hai qarz kī ye shaan ki lo aur kabhī na do

das biis haath khaao to do chaar ḳhud dharo

marne pe qarz-ḳhvāhoñ ke chande se yuuñ uTho

damḌī na apnī ḳharch ho is ThāTh se maro

chhe saat saal qarz ke paise na jab diye

das biis sūd-ḳhvār to yūñhī Dhalak ga.e

jo adh-mūe the vo bhī the kuchh aise kaj-rave

be-sabr ho ke bole hazrat ham to ab chale

vo ham ne qarz-ḳhvāhoñ kī miTTī palīd kī

vo ḳhud to mar ga.e pa raqam un kī rah ga.ī

hum ko mulazmat jo khaDe ghaT mil gai

bachhon ki naw kanon ke sahil se ja lagi

chiTThi phir un ko hum ne ba-sad-shauq yun likhi

aaya karo idhar bhi mari jaan kabhi kabhi

dil ne kaha ki jhum ke nare lagaiye

taKHti laga ke piTh se ab ghum jaiye

aa jaiye to mil ke mahajan ko luT len

qarza wo len ki asl kabhi den na sud den

wo qarz phir liye hain ki allah ki panah!

rupe usi se len meri jis par paDi nigah

phir us ke bhagne ki bhi chhoDi na koi rah

sab ke langoTi bandh gai, haalat hui tabah

yara na tha fughan ka, na mauqa tha aah ka

pitta phaTa hua tha har ek qarz-KHwah ka

qarze pe hum ne ek makan aisa le liya

jis mein ki do taraf se tha jaane ka rasta

jab sare qarz-KHwahon ko is ka pata chala

har fard le ke apna bahi-khata aa gaya

tha har taraf se shor ki tashrif laiye

sannaTa kah raha tha ki DanDe bajaiye

pahli jo aai ek qayamat macha gai

bil le ke qarz-KHwahon ki ek fauj aa gai

har qarz-KHwah hadd-e-adab langne laga

dil apni maghfirat ki dua mangne laga

har samt lad lad ke girne lage jo bam

garmaya dil to aaya tabiat mein pech-o-KHam

rah rah ke apni boTiyan hum nochne lage

aur KHud-kushi ki rah nai sochne lage

hai qarz ki ye shan ki lo aur kabhi na do

das bis hath khao to do chaar KHud dharo

marne pe qarz-KHwahon ke chande se yun uTho

damDi na apni KHarch ho is ThaTh se maro

chhe sat sal qarz ke paise na jab diye

das bis sud-KHwar to yunhi Dhalak gae

jo adh-mue the wo bhi the kuchh aise kaj-rawe

be-sabr ho ke bole hazrat hum to ab chale

wo hum ne qarz-KHwahon ki miTTi palid ki

wo KHud to mar gae pa raqam un ki rah gai