aag sa tu jo hua ai gul-e-tar aan ke bich

aag sā tū jo huā ai gul-e-tar aan ke biich

sub.h kī baav ne kyā phūñk diyā kaan ke biich

ham na kahte the kahīñ zulf kahīñ ruḳh na dikhā

ik ḳhilāf aaya na hindū-o-musalmān ke biich

bāvajūd-e-malakiyyat na malak meñ paayā

vo taqaddus ki jo hai hazrat-e-insān ke biich

pāsbāñ se tire kyā duur jo ho sāz-e-raqīb

hai na ik tarah kī nisbat sag-o-darbān ke biich

jaisī izzat mirī dīvāñ meñ amīroñ ke huī

vaisī hī un kī bhī hogī mire dīvān ke biich

saath hai us sar-e-uryāñ ke ye vahshat karnā

pagḌī uljhī hai mirī ab to bayābān ke biich

ve phirī palkeñ agar khub ga.iiñ jī meñ to vahīñ

raḳhne paḌ jā.eñge vaa.iz tire īmān ke biich

kyā kahūñ ḳhūbī-e-ḳhat dekh huī band āvāz

surma goyā ki diyā un ne mujhe paan ke biich

ghar meñ ā.īne ke kab tak tumheñ nāzāñ dekhūñ

kabhū to aao mire dīda-e-hairān ke biich

mīrzā.ī kā kab ai 'mīr' chalā ishq meñ kaam

kuchh ta.ab khīñchne ko taab to ho jaan ke biich

aag sa tu jo hua ai gul-e-tar aan ke bich

subh ki baw ne kya phunk diya kan ke bich

hum na kahte the kahin zulf kahin ruKH na dikha

ek KHilaf aaya na hindu-o-musalman ke bich

bawajud-e-malakiyyat na malak mein paya

wo taqaddus ki jo hai hazrat-e-insan ke bich

pasban se tere kya dur jo ho saz-e-raqib

hai na ek tarah ki nisbat sag-o-darban ke bich

jaisi izzat meri diwan mein amiron ke hui

waisi hi un ki bhi hogi mere diwan ke bich

sath hai us sar-e-uryan ke ye wahshat karna

pagDi uljhi hai meri ab to bayaban ke bich

we phiri palken agar khub gain ji mein to wahin

raKHne paD jaenge waiz tere iman ke bich

kya kahun KHubi-e-KHat dekh hui band aawaz

surma goya ki diya un ne mujhe pan ke bich

ghar mein aaine ke kab tak tumhein nazan dekhun

kabhu to aao mere dida-e-hairan ke bich

mirzai ka kab ai 'mir' chala ishq mein kaam

kuchh tab khinchne ko tab to ho jaan ke bich