aah wo aashiq-sitam tark-e-jafa karta nahin

aah vo āshiq-sitam tark-e-jafā kartā nahīñ

aur mutlaq ab dimāġh apnā vafā kartā nahīñ

baat meñ ġhairoñ ko chup kar duuñ va-lekin kyā karūñ

vo suḳhan-nashno tanik merā kahā kartā nahīñ

roz bad-tar jaise bīmār-e-ajal hai dil kā haal

ye samajh kar ham-nashīñ ab maiñ davā kartā nahīñ

goiyā bāb-e-ijābat hijr meñ teġhā huā

varna kis shab aap ko maiñ badduā kartā nahīñ

be-kasān-e-ishq us ke aah kis ke paas jaa.eñ

gor bin koī silā maiñ lab ko vā kartā nahīñ

chhūTnā mumkin nahīñ apnā qafas kī qaid se

murġh-e-sair-āhang ko koī rihā kartā nahīñ

charḳh kī bhī kaj-adā.ī ham hī par jaatī hai pesh

naaz ko us se to ik dam bhī judā kartā nahīñ

dekh use be-dīd ho āñkhoñ ne kyā dekhā bhalā

dil bhī bad kartā hai mujh se to bhalā kartā nahīñ

kyūñke dekhī jaa.e ye begāna-vaza.ī mujh se shoḳh

tū to īdhar yak nigāh-e-āshnā kartā nahīñ

kyā kahūñ pahuñchā kahāñ tak 'mīr' apnā kār-e-shauq

yaañ se kis din ik nayā qāsid chalā kartā nahīñ

aah wo aashiq-sitam tark-e-jafa karta nahin

aur mutlaq ab dimagh apna wafa karta nahin

baat mein ghairon ko chup kar dun wa-lekin kya karun

wo suKHan-nashno tanik mera kaha karta nahin

roz bad-tar jaise bimar-e-ajal hai dil ka haal

ye samajh kar ham-nashin ab main dawa karta nahin

goiya bab-e-ijabat hijr mein tegha hua

warna kis shab aap ko main baddua karta nahin

be-kasan-e-ishq us ke aah kis ke pas jaen

gor bin koi sila main lab ko wa karta nahin

chhuTna mumkin nahin apna qafas ki qaid se

murgh-e-sair-ahang ko koi riha karta nahin

charKH ki bhi kaj-adai hum hi par jati hai pesh

naz ko us se to ek dam bhi juda karta nahin

dekh use be-did ho aankhon ne kya dekha bhala

dil bhi bad karta hai mujh se to bhala karta nahin

kyunke dekhi jae ye begana-wazai mujh se shoKH

tu to idhar yak nigah-e-ashna karta nahin

kya kahun pahuncha kahan tak 'mir' apna kar-e-shauq

yan se kis din ek naya qasid chala karta nahin