آہ وہ عاشق ستم ترک جفا کرتا نہیں

آہ وہ عاشق ستم ترک جفا کرتا نہیں

اور مطلق اب دماغ اپنا وفا کرتا نہیں

بات میں غیروں کو چپ کر دوں ولیکن کیا کروں

وہ سخن نشنو تنک میرا کہا کرتا نہیں

روز بد تر جیسے بیمار اجل ہے دل کا حال

یہ سمجھ کر ہم نشیں اب میں دوا کرتا نہیں

گویئا باب اجابت ہجر میں تیغا ہوا

ورنہ کس شب آپ کو میں بد دعا کرتا نہیں

بے کسان عشق اس کے آہ کس کے پاس جائیں

گور بن کوئی صلا میں لب کو وا کرتا نہیں

چھوٹنا ممکن نہیں اپنا قفس کی قید سے

مرغ سیر آہنگ کو کوئی رہا کرتا نہیں

چرخ کی بھی کج ادائی ہم ہی پر جاتی ہے پیش

ناز کو اس سے تو اک دم بھی جدا کرتا نہیں

دیکھ اسے بے دید ہو آنکھوں نے کیا دیکھا بھلا

دل بھی بد کرتا ہے مجھ سے تو بھلا کرتا نہیں

کیونکے دیکھی جائے یہ بیگانہ وضعی مجھ سے شوخ

تو تو ایدھر یک نگاہ آشنا کرتا نہیں

کیا کہوں پہنچا کہاں تک میرؔ اپنا کار شوق

یاں سے کس دن اک نیا قاصد چلا کرتا نہیں