aaj hamara dil taDpe hai koi udhar se aawega

aaj hamārā dil taḌpe hai koī udhar se āvegā

yā ki navishta un hāthoñ kā qāsid ham tak lāvegā

ham nahīñ likhte is liye us ko shoḳh bahut hai vo laḌkā

ḳhat kā kāġhaz-bādī karegā baav kā ruḳh batlāvegā

ranj bahut khīñche the ham ne tāqat jī kī tamām huī

apne kiye par yaad rahe ye vo bhī bahut pachhtāvegā

andhe se ham chaah meñ us kī go ai nāseh phirte haiñ

sūjhtā bhī kuchh kar ā.eñge kyā tū ham ko sujhāvegā

āshiq hove vo bhī yā-rab tā kuchh us se kahā jaave

ya.anī haal sunegā dil se dil jo kisī se lagāvegā

āshiq kī dil-jūī kī bhī rāh-o-rasm se vāqif rah

ho jo aisā gum-shuda apnā us ko na tū phir pāvegā

āñkheñ mūñde ye dilbar jo sote raheñ to behtar hai

chashmak karnā ek unhoñ kā sau sau fitne jagāvegā

kyā sūrat hai kyā qāmat hai dast-o-pā kyā nāzuk haiñ

aise putle muñh dekho jo koī kulāl banāvegā

chitvan be-Dhab āñkheñ phirīñ haiñ palkoñ se bhī nazar chhoTī

ishq abhī kyā jāniye ham ko kyā kyā 'mīr' dikhāvegā

aaj hamara dil taDpe hai koi udhar se aawega

ya ki nawishta un hathon ka qasid hum tak lawega

hum nahin likhte is liye us ko shoKH bahut hai wo laDka

KHat ka kaghaz-baadi karega baw ka ruKH batlawega

ranj bahut khinche the hum ne taqat ji ki tamam hui

apne kiye par yaad rahe ye wo bhi bahut pachhtawega

andhe se hum chah mein us ki go ai naseh phirte hain

sujhta bhi kuchh kar aaenge kya tu hum ko sujhawega

aashiq howe wo bhi ya-rab ta kuchh us se kaha jawe

yani haal sunega dil se dil jo kisi se lagawega

aashiq ki dil-jui ki bhi rah-o-rasm se waqif rah

ho jo aisa gum-shuda apna us ko na tu phir pawega

aankhen munde ye dilbar jo sote rahen to behtar hai

chashmak karna ek unhon ka sau sau fitne jagawega

kya surat hai kya qamat hai dast-o-pa kya nazuk hain

aise putle munh dekho jo koi kulal banawega

chitwan be-Dhab aankhen phirin hain palkon se bhi nazar chhoTi

ishq abhi kya jaaniye hum ko kya kya 'mir' dikhawega