aaj hamara sar phirta hai baaten jitni sab mauquf

aaj hamārā sar phirtā hai bāteñ jitnī sab mauqūf

harf-o-suḳhan jo bā-yak-dīgar rahte the so ab mauqūf

kis ko dimāġh ab us se rahā yaañ aaTh pahar kī minnat kā

rabt iḳhlās se din guzre hai ḳhalta us se sab mauqūf

us kī galī meñ āmad-o-shud kī ghaat hī meñ ham rahte the

ab jo shikasta-pā ho baiThe Dhab karne ke Dhab mauqūf

vo jo maane ho to kyā hai shauq kamāl ko pahuñchā hai

vaqfa hogā tab milne meñ ham bhī kareñge jab mauqūf

halqe paḌe haiñ chashm-e-tar meñ sūkhe aise tum na rahe

ronā kuḌhnā ishq meñ us ke 'mīr' karoge kab mauqūf

aaj hamara sar phirta hai baaten jitni sab mauquf

harf-o-suKHan jo ba-yak-digar rahte the so ab mauquf

kis ko dimagh ab us se raha yan aaTh pahar ki minnat ka

rabt iKHlas se din guzre hai KHalta us se sab mauquf

us ki gali mein aamad-o-shud ki ghat hi mein hum rahte the

ab jo shikasta-pa ho baiThe Dhab karne ke Dhab mauquf

wo jo mane ho to kya hai shauq kamal ko pahuncha hai

waqfa hoga tab milne mein hum bhi karenge jab mauquf

halqe paDe hain chashm-e-tar mein sukhe aise tum na rahe

rona kuDhna ishq mein us ke 'mir' karoge kab mauquf