آج ہمارا سر پھرتا ہے باتیں جتنی سب موقوف

آج ہمارا سر پھرتا ہے باتیں جتنی سب موقوف

حرف و سخن جو بایک دیگر رہتے تھے سو اب موقوف

کس کو دماغ اب اس سے رہا یاں آٹھ پہر کی منت کا

ربط اخلاص سے دن گزرے ہے خلطہ اس سے سب موقوف

اس کی گلی میں آمد و شد کی گھات ہی میں ہم رہتے تھے

اب جو شکستہ پا ہو بیٹھے ڈھب کرنے کے ڈھب موقوف

وہ جو مانع ہو تو کیا ہے شوق کمال کو پہنچا ہے

وقفہ ہوگا تب ملنے میں ہم بھی کریں گے جب موقوف

حلقے پڑے ہیں چشم تر میں سوکھے ایسے تم نہ رہے

رونا کڑھنا عشق میں اس کے میرؔ کرو گے کب موقوف