aalam-e-ilm mein ek the hum we haif hai un ko giyan nahin

'ālam-e-'ilm meñ ek the ham ve haif hai un ko giyān nahīñ

ab kahte haiñ ḳhalta kaisā jaan nahīñ pahchān nahīñ

kis ummīd pe sākin hove koī ġharīb-e-shahr us kā

lutf nahīñ ikrām nahīñ in'ām nahīñ ehsān nahīñ

haa.e latāfat jism kī us ke mar hī gayā huuñ pūchho mat

jab se tan-e-nāzuk vo dekhā tab se mujh meñ jaan nahīñ

kyā bātoñ se tasallī ho dil mushkil-e-'ishqī merī sab

yaar se kahne kahte haiñ par kahnā kuchh āsān nahīñ

shām-o-sahar ham sar-zada dāman sar-ba-garebāñ rahte haiñ

ham ko ḳhayāl udhar hī kā hai un ko idhar kā dhyān nahīñ

jaan ke maiñ to aap banā huuñ in laḌkoñ meñ dīvāna

'aql se bhī bahra hai mujh ko itnā maiñ nādān nahīñ

paañv ko dāman-e-mahshar meñ nā-chārī se ham khīñcheñge

laa.iq apnī vahshat ke us 'arse kā maidān nahīñ

chāhat meñ us māya-e-jāñ kī marne ke shā.ista hue

jā bhī chukī hai dil kī havas ab jiine kā armān nahīñ

shor nahīñ yaañ suntā koī 'mīr' qafas ke asīroñ kā

gosh nahīñ dīvār-e-chaman ke gul ke shāyad kaan nahīñ

'alam-e-'ilm mein ek the hum we haif hai un ko giyan nahin

ab kahte hain KHalta kaisa jaan nahin pahchan nahin

kis ummid pe sakin howe koi gharib-e-shahr us ka

lutf nahin ikram nahin in'am nahin ehsan nahin

hae latafat jism ki us ke mar hi gaya hun puchho mat

jab se tan-e-nazuk wo dekha tab se mujh mein jaan nahin

kya baaton se tasalli ho dil mushkil-e-'ishqi meri sab

yar se kahne kahte hain par kahna kuchh aasan nahin

sham-o-sahar hum sar-zada daman sar-ba-gareban rahte hain

hum ko KHayal udhar hi ka hai un ko idhar ka dhyan nahin

jaan ke main to aap bana hun in laDkon mein diwana

'aql se bhi bahra hai mujh ko itna main nadan nahin

panw ko daman-e-mahshar mein na-chaari se hum khinchenge

laiq apni wahshat ke us 'arse ka maidan nahin

chahat mein us maya-e-jaan ki marne ke shaista hue

ja bhi chuki hai dil ki hawas ab jine ka arman nahin

shor nahin yan sunta koi 'mir' qafas ke asiron ka

gosh nahin diwar-e-chaman ke gul ke shayad kan nahin