aashiq tere lakhon hue mujh sa na phir paida hua

āshiq tire lākhoñ hue mujh sā na phir paidā huā

tujh par koī ai kām-e-jāñ dekhā na yuuñ martā huā

muddat huī ulfat ga.ī barsoñ hue tāqat ga.ī

dil muztarib aisā na thā kyā jāniye ab kyā huā

kal sub.h sair-e-bāġh meñ dil aur merā ruk gayā

bulbul na bolā muñh se kuchh gul Tuk na mujh se vā huā

ve din ga.e jo yaañ kabhū uThtā thā dil se josh sā

ab lag ga.e rone jahāñ pal mārte dariyā huā

kitnoñ ke dil be-jāñ hue kitne na jaanā kyā hue

chalne meñ us ke do qadam hangāma ik barpā huā

mastī meñ laġhzish ho ga.ī ma.azūr rakkhā chāhiye

ai ahl-e-masjid is taraf aaya huuñ maiñ bahkā huā

juuñ husn hai ik fitna-gar tuuñ ishq bhī hai parda-dar

vo shohra-e-ālam huā maiñ ḳhalq meñ rusvā huā

farhād-o-majnūñ vuuñ ga.e ham aur vāmiq yuuñ chale

is ārize se chaah ke vo kaun sā achchhā huā

yā harf-e-ḳhat hai darmiyāñ yā gesuoñ kā hai bayāñ

kyā 'mīr' sāhab ke ta.iiñ phir in dinoñ saudā huā

aashiq tere lakhon hue mujh sa na phir paida hua

tujh par koi ai kaam-e-jaan dekha na yun marta hua

muddat hui ulfat gai barson hue taqat gai

dil muztarib aisa na tha kya jaaniye ab kya hua

kal subh sair-e-bagh mein dil aur mera ruk gaya

bulbul na bola munh se kuchh gul Tuk na mujh se wa hua

we din gae jo yan kabhu uThta tha dil se josh sa

ab lag gae rone jahan pal marte dariya hua

kitnon ke dil be-jaan hue kitne na jaana kya hue

chalne mein us ke do qadam hangama ek barpa hua

masti mein laghzish ho gai mazur rakkha chahiye

ai ahl-e-masjid is taraf aaya hun main bahka hua

jun husn hai ek fitna-gar tun ishq bhi hai parda-dar

wo shohra-e-alam hua main KHalq mein ruswa hua

farhad-o-majnun wun gae hum aur wamiq yun chale

is aarize se chah ke wo kaun sa achchha hua

ya harf-e-KHat hai darmiyan ya gesuon ka hai bayan

kya 'mir' sahab ke tain phir in dinon sauda hua