aati hai KHun ki bu dosti-e-yar ke bich

aatī hai ḳhuun kī bū dostī-e-yār ke biich

jī liye un ne hazāroñ ke yūñhī pyaar ke biich

haif vo kushta ki sau ranj se aave tujh tak

aur rah jaa.e tirī ek hī talvār ke biich

garche chhuptī nahīñ hai chaah pa rah munkir-pāk

jī hī denā paḌe hai ishq ke iqrār ke biich

naala shab aave qafas se to gul ab us pe na jā

yahī hunkār sī hai murġh-e-giraftār ke biich

uns kartā to hai vo mujh ko ḳhirad-bāḳhta jaan

jiit maiñ apnī nikālī hai isī haar ke biich

chaal kyā kabk kī ik baat chalī aatī hai

lutf nikle haiñ hazāroñ tirī raftār ke biich

tū jo jaatā hai chaman meñ to tamāshe ke liye

mausam-e-rafta bhī phir aave hai gulzār ke biich

dāġh-e-chechak na is ifrāt se the mukhḌe par

kin ne gaaḌī haiñ nigāheñ tire ruḳhsār ke biich

ghaTTe shamshīr-zanī se kaf-e-nāzuk meñ haiñ

ye jigar-dārī thī kis ḳhuuñ ke sazā-vār ke biich

tauba sad baar ki mastī meñ piro Daale haiñ

daane tasbīh ke maiñ rishta-e-zunnār ke biich

halqa-e-gesū-e-ḳhūbāñ pe na kar chashm siyāh

'mīr' amrit nahīñ hotā dahan-e-mār ke biich

aati hai KHun ki bu dosti-e-yar ke bich

ji liye un ne hazaron ke yunhi pyar ke bich

haif wo kushta ki sau ranj se aawe tujh tak

aur rah jae teri ek hi talwar ke bich

garche chhupti nahin hai chah pa rah munkir-pak

ji hi dena paDe hai ishq ke iqrar ke bich

nala shab aawe qafas se to gul ab us pe na ja

yahi hunkar si hai murgh-e-giraftar ke bich

uns karta to hai wo mujh ko KHirad-baKHta jaan

jit main apni nikali hai isi haar ke bich

chaal kya kabk ki ek baat chali aati hai

lutf nikle hain hazaron teri raftar ke bich

tu jo jata hai chaman mein to tamashe ke liye

mausam-e-rafta bhi phir aawe hai gulzar ke bich

dagh-e-chechak na is ifraat se the mukhDe par

kin ne gaDi hain nigahen tere ruKHsar ke bich

ghaTTe shamshir-zani se kaf-e-nazuk mein hain

ye jigar-dari thi kis KHun ke saza-war ke bich

tauba sad bar ki masti mein piro Dale hain

dane tasbih ke main rishta-e-zunnar ke bich

halqa-e-gesu-e-KHuban pe na kar chashm siyah

'mir' amrit nahin hota dahan-e-mar ke bich