aaya hai abr jab ka qible se tera tira

aaya hai abr jab kā qible se tiira tiira

mastī ke zauq meñ haiñ āñkheñ bahut hī ḳhīra

ḳhajlat se un laboñ ke paanī ho beh chale haiñ

qand-o-nabāt kā bhī niklā hai ḳhuub shīra

majnūñ ne hausle se dīvāngī nahīñ kī

jāgah se apnī jaanā apnā nahīñ vatīra

us rāhzan se mil kar dil kyūñke kho na baiTheñ

andāz-o-nāz uchakke ġhamza uThā.ī-gīrā

kyā kam hai haul-nākī sahrā-e-āshiqī kī

sheroñ ko us jagah par hotā hai qash.arīrā

ā.īne ko bhī dekho par Tuk idhar bhī dekho

hairān chashm-e-āshiq damke hai jaise hiirā

niyyat pe sab banā hai yaañ masjid ik baḌī thī

pīr-e-muġhāñ muā so us kā banā hazīra

hamrāh ḳhuuñ talak ho Tuk paañv ke chhue se

aisā gunāh mujh se vo kyā huā kabīra

ġhairat se 'mīr' sāhib sab jazb ho ga.e the

niklā na buuñd lohū siina jo un kā chīrā

aaya hai abr jab ka qible se tera tera

masti ke zauq mein hain aankhen bahut hi KHira

KHajlat se un labon ke pani ho beh chale hain

qand-o-nabaat ka bhi nikla hai KHub shira

majnun ne hausle se diwangi nahin ki

jagah se apni jaana apna nahin watira

us rahzan se mil kar dil kyunke kho na baiThen

andaz-o-naz uchakke ghamza uThai-gira

kya kam hai haul-naki sahra-e-ashiqi ki

sheron ko us jagah par hota hai qasharira

aaine ko bhi dekho par Tuk idhar bhi dekho

hairan chashm-e-ashiq damke hai jaise hira

niyyat pe sab bana hai yan masjid ek baDi thi

pir-e-mughan mua so us ka bana hazira

hamrah KHun talak ho Tuk panw ke chhue se

aisa gunah mujh se wo kya hua kabira

ghairat se 'mir' sahib sab jazb ho gae the

nikla na bund lohu sina jo un ka chira