آیا ہے ابر جب کا قبلے سے تیرہ تیرہ (ردیف .. ا)

آیا ہے ابر جب کا قبلے سے تیرہ تیرہ

مستی کے ذوق میں ہیں آنکھیں بہت ہی خیرہ

خجلت سے ان لبوں کے پانی ہو بہ چلے ہیں

قند و نبات کا بھی نکلا ہے خوب شیرہ

مجنوں نے حوصلے سے دیوانگی نہیں کی

جاگہ سے اپنی جانا اپنا نہیں وطیرہ

اس راہزن سے مل کر دل کیونکے کھو نہ بیٹھیں

انداز و ناز اچکے غمزہ اٹھائی گیرا

کیا کم ہے ہولناکی صحرائے عاشقی کی

شیروں کو اس جگہ پر ہوتا ہے قشعریرا

آئینے کو بھی دیکھو پر ٹک ادھر بھی دیکھو

حیران چشم عاشق دمکے ہے جیسے ہیرا

نیت پہ سب بنا ہے یاں مسجد اک بڑی تھی

پیر مغاں موا سو اس کا بنا حظیرہ

ہم راہ خوں تلک ہو ٹک پاؤں کے چھوئے سے

ایسا گناہ مجھ سے وہ کیا ہوا کبیرہ

غیرت سے میرؔ صاحب سب جذب ہو گئے تھے

نکلا نہ بوند لوہو سینہ جو ان کا چیرا