aazar dekhe kya kya in palkon se aTak kar

āzār dekhe kyā kyā in palkoñ se aTak kar

jī le ga.e ye kāñTe dil meñ khaTak khaTak kar

sarv-o-tadarv donoñ phir aap meñ na aa.e

gulzār meñ chalā thā vo shoḳh Tuk laTak kar

kab aañkh khol dekhā tere ta.iiñ sirhāne

nā-chār mar ga.e ham sar ko paTak paTak kar

hāsil ba-juz kudūrat is ḳhāk-dāñ se kyā hai

ḳhush vo ki uTh ga.e haiñ dāmāñ jhaTak jhaTak kar

ye musht-e-ḳhāk yā'nī insān hī hai rū-kash

varna uThā.ī kin ne is āsmāñ kī Takkar

dil kaam chāhtā hai ab us ke gesuoñ se

vaañ mar ga.e haiñ kitne barsoñ aTak aTak kar

Tuk muñh se us ke dī-shab burqa’ sarak gayā thā

jaatī rahī nazar se mahtāb sī chhiTak kar

dhaulā chuke the mil kar kal lauñDe mai-kade ke

pur-sargirāñ ho vā'iz jaatā rahā saTak kar

kal raqs-e-shaiḳh mutlaq dil ko lagā na mere

aaya vo hīz-e-shar’ī kitnā maTak maTak kar

manzil kī 'mīr' us kī kab raah tujh se nikle

yaañ ḳhizr se hazāroñ mar mar ga.e bhaTak kar

aazar dekhe kya kya in palkon se aTak kar

ji le gae ye kanTe dil mein khaTak khaTak kar

sarw-o-tadarw donon phir aap mein na aae

gulzar mein chala tha wo shoKH Tuk laTak kar

kab aankh khol dekha tere tain sirhane

na-chaar mar gae hum sar ko paTak paTak kar

hasil ba-juz kudurat is KHak-dan se kya hai

KHush wo ki uTh gae hain daman jhaTak jhaTak kar

ye musht-e-KHak ya'ni insan hi hai ru-kash

warna uThai kin ne is aasman ki Takkar

dil kaam chahta hai ab us ke gesuon se

wan mar gae hain kitne barson aTak aTak kar

Tuk munh se us ke di-shab burqa’ sarak gaya tha

jati rahi nazar se mahtab si chhiTak kar

dhaula chuke the mil kar kal launDe mai-kade ke

pur-sargiran ho wa'iz jata raha saTak kar

kal raqs-e-shaiKH mutlaq dil ko laga na mere

aaya wo hiz-e-shar’i kitna maTak maTak kar

manzil ki 'mir' us ki kab rah tujh se nikle

yan KHizr se hazaron mar mar gae bhaTak kar