aazar-kash ko uske aazar hai hamesha

āzār-kash ko us ke āzār hai hamesha

āzurda-dil kisū kā bīmār hai hamesha

muḳhtār-e-ishq us kā majbūr hī hai ya.anī

yak rah do-chār ho kar nā-chār hai hamesha

kab sahl āshiqī meñ auqāt guzre hai yaañ

kaam apnā is par us bin dushvār hai hamesha

aalam kā ain usī ko ma.alūm kar chuke haiñ

is vajah se ab us kā dīdār hai hamesha

us se husūl-e-matlab apnā huā na hogā

bā-āñki kaam dil kā iz.hār hai hamesha

parvā-e-naf-o-nuqsāñ mutlaq nahīñ hai us ko

us kī to lā-ubālī sarkār hai hamesha

milnā na milnā Thahre to dil bhī Thahre apnā

iqrār hai hamesha inkār hai hamesha

āmāda-e-fanā kuchh kyā 'mīr' ab huā hai

jī muft dene ko vo tayyār hai hamesha

aazar-kash ko us ke aazar hai hamesha

aazurda-dil kisu ka bimar hai hamesha

muKHtar-e-ishq us ka majbur hi hai yani

yak rah do-chaar ho kar na-chaar hai hamesha

kab sahl aashiqi mein auqat guzre hai yan

kaam apna is par us bin dushwar hai hamesha

aalam ka ain usi ko malum kar chuke hain

is wajah se ab us ka didar hai hamesha

us se husul-e-matlab apna hua na hoga

ba-anki kaam dil ka izhaar hai hamesha

parwa-e-naf-o-nuqsan mutlaq nahin hai us ko

us ki to la-ubaali sarkar hai hamesha

milna na milna Thahre to dil bhi Thahre apna

iqrar hai hamesha inkar hai hamesha

aamada-e-fana kuchh kya 'mir' ab hua hai

ji muft dene ko wo tayyar hai hamesha