ab asiri se bachen to dekhenge gulshan kabhu

ab asīrī se bacheñ to dekheñge gulshan kabhū

thā hamārā bhī chaman meñ ai sabā maskan kabhū

ham bhī ek ummīd par is said-gah meñ haiñ paḌe

kahte haiñ aatā hai īdhar vo shikār-afgan kabhū

band paayā jeb meñ yā sar se maarā tang ho

dast-e-kotah meñ na aaya apne vo dāman kabhū

yaar kī bargashta mizhgāñ se na dil ko jam' rakh

bad-balā hai phir khaḌī hove jo ye palTan kabhū

jaan koī kyoñ na do us be-muravvat ke liye

āshnā hotā nahīñ vo dostī-dushman kabhū

huuñ to nālāñ zer-e-dīvār-e-chaman par zo'f se

gosh-zad gul ke nahīñ hotā mirā shevan kabhū

dil magar un jāma-zeboñ ko diyā hai 'mīr' ne

is tarah phirte na the ve chāk-pairāhan kabhū

ab asiri se bachen to dekhenge gulshan kabhu

tha hamara bhi chaman mein ai saba maskan kabhu

hum bhi ek ummid par is said-gah mein hain paDe

kahte hain aata hai idhar wo shikar-afgan kabhu

band paya jeb mein ya sar se mara tang ho

dast-e-kotah mein na aaya apne wo daman kabhu

yar ki bargashta mizhgan se na dil ko jam' rakh

bad-bala hai phir khaDi howe jo ye palTan kabhu

jaan koi kyon na do us be-murawwat ke liye

aashna hota nahin wo dosti-dushman kabhu

hun to nalan zer-e-diwar-e-chaman par zo'f se

gosh-zad gul ke nahin hota mera shewan kabhu

dil magar un jama-zebon ko diya hai 'mir' ne

is tarah phirte na the we chaak-pairahan kabhu