ab tak to nibhi achchhi ab dekhiye piri hai

ab tak to nibhī achchhī ab dekhiye piirī hai

sab logoñ meñ haiñ lāgeñ yaañ mahz faqīrī hai

kyā dhiir bañdhe us kī jo ishq kā rusvā ho

nikle to kaheñ laḌke dhīrī hai be dhīrī hai

ḳhuuñ ishq kī garmī se sūkhā jigar-o-dil meñ

ik buuñd thī lohū kī ab chhātī jo chīrī hai

ham tā.ir-e-nau-par haiñ ve jin ko bahārāñ meñ

gul-gasht-e-gulistāñ kā hai shauq o asīrī hai

us dilbar-e-bad-zan se ḳhush guzre hai āshiq kī

ne rahm hai ḳhātir meñ ne uzr-pazīrī hai

ham marsiya dil hī kā aksar kahā karte haiñ

ab kariye taḳhallus to shā.ista-zamīrī hai

kyā ahl-e-duval se hai ai 'mīr' mujhe nisbat

yaañ ijz-o-faqīrī hai vaañ nāz-e-amīrī hai

ab tak to nibhi achchhi ab dekhiye piri hai

sab logon mein hain lagen yan mahz faqiri hai

kya dhir bandhe us ki jo ishq ka ruswa ho

nikle to kahen laDke dhiri hai be dhiri hai

KHun ishq ki garmi se sukha jigar-o-dil mein

ek bund thi lohu ki ab chhati jo chiri hai

hum tair-e-nau-par hain we jin ko bahaaran mein

gul-gasht-e-gulistan ka hai shauq o asiri hai

us dilbar-e-bad-zan se KHush guzre hai aashiq ki

ne rahm hai KHatir mein ne uzr-paziri hai

hum marsiya dil hi ka aksar kaha karte hain

ab kariye taKHallus to shaista-zamiri hai

kya ahl-e-duwal se hai ai 'mir' mujhe nisbat

yan ijz-o-faqiri hai wan naz-e-amiri hai