ab tang hun bahut main mat aur dushmani kar

ab tang huuñ bahut maiñ mat aur dushmanī kar

laagū ho mere jī kā utnī hī dostī kar

jab tak shigāf the kuchh itnā na jī ruke thā

pachhtā.e ham nihāyat siine ke chaak sī kar

qissa nahīñ sunā kyā yūsuf hī kā jo tū ne

ab bhā.iyoñ se chande to gurg-āshtī kar

nāsāzī-o-ḳhushūnat jangal hī chāhtī hai

shahroñ meñ ham na dekhā bālīda hote kīkar

kuchh aaj ashk-e-ḳhūnīñ maiñ ne nahīñ chhupā.e

rah rah gayā huuñ barsoñ lohū ko apne pī kar

kis murdanī ko us bin bhātī hai zindagānī

bas jī chukā bahut maiñ ab kyā karūñgā jī kar

harf-e-ġhalat ko sun kar darpe na ḳhuuñ ke honā

jo kuchh kiyā hai maiñ ne pahle use sahī kar

din-rāt kuḌhte-kuḌhte maiñ bhī bahut rukā huuñ

jo tujh se ho sake so ab tū bhī mat kamī kar

rahtī hai so nikoī rahtā nahīñ hai koī

tū bhī jo yaañ rahe to zinhār mat badī kar

thī jab talak javānī ranj-o-ta.ab uThā.e

ab kyā hai 'mīr' jī meñ tark-e-sitamgarī kar

ab tang hun bahut main mat aur dushmani kar

lagu ho mere ji ka utni hi dosti kar

jab tak shigaf the kuchh itna na ji ruke tha

pachhtae hum nihayat sine ke chaak si kar

qissa nahin suna kya yusuf hi ka jo tu ne

ab bhaiyon se chande to gurg-ashti kar

nasazi-o-KHushunat jangal hi chahti hai

shahron mein hum na dekha baalida hote kikar

kuchh aaj ashk-e-KHunin main ne nahin chhupae

rah rah gaya hun barson lohu ko apne pi kar

kis murdani ko us bin bhati hai zindagani

bas ji chuka bahut main ab kya karunga ji kar

harf-e-ghalat ko sun kar darpe na KHun ke hona

jo kuchh kiya hai main ne pahle use sahi kar

din-raat kuDhte-kuDhte main bhi bahut ruka hun

jo tujh se ho sake so ab tu bhi mat kami kar

rahti hai so nikoi rahta nahin hai koi

tu bhi jo yan rahe to zinhaar mat badi kar

thi jab talak jawani ranj-o-tab uThae

ab kya hai 'mir' ji mein tark-e-sitamgari kar