abr-e-siyah qible se uTh kar aaya hai maiKHane par

abr-e-siyah qible se uTh kar aayā hai maiḳhāne par

bāda-kashoñ kā jhurmuT hai kuchh shīshe par paimāne par

rang havā se Tapakne lagā hai sabze meñ koī phuul khilā

yā'nī chashmak gul kartā hai fasl-e-bahār ke aane par

shor-e-junūñ hai javānoñ ke sar meñ paañv meñ zanjīreñ haiñ

sang-zanāñ laḌke phirte haiñ har-har-sū dīvāne par

betābāna sham' par aayā gird phirā phir jal hī gayā

apnā jī bhī had se ziyāda raat jalā parvāne par

qadr-e-jān jo kuchh hove to sarfa bhī ham 'mīr' kareñ

muñh moḌeñ kyā aane se us ke apnī jaan ke jaane par

abr-e-siyah qible se uTh kar aaya hai maiKHane par

baada-kashon ka jhurmuT hai kuchh shishe par paimane par

rang hawa se Tapakne laga hai sabze mein koi phul khila

ya'ni chashmak gul karta hai fasl-e-bahaar ke aane par

shor-e-junun hai jawanon ke sar mein panw mein zanjiren hain

sang-zanan laDke phirte hain har-har-su diwane par

betabana sham' par aaya gird phira phir jal hi gaya

apna ji bhi had se ziyaada raat jala parwane par

qadr-e-jaan jo kuchh howe to sarfa bhi hum 'mir' karen

munh moDen kya aane se us ke apni jaan ke jaane par