ahd-e-junun hai mausam gul ka aur shagufa laya hai

ahd-e-junūñ hai mausam gul kā aur shagūfa laayā hai

abr-e-bahārī vaadī se uTh kar ābādī par aayā hai

sun kar mere shor-e-shab ko jhuñjhlā kar vo kahne lagā

naale is ke falak tak pahuñche kin ne is ko satāyā hai

dakhkhin uttar pūrab pachchhim hangāma hai sab jāgah

ūdham mere harf-o-suḳhan ne chāroñ or machāyā hai

be-chashm-o-rū ho baiThe ho vaj.h nahīñ hai zāhir kuchh

kaam kī sūrat bigḌī hamārī muñh kyoñ tum ne banāyā hai

zulm-o-sitam sab sahl haiñ us ke ham se uThte haiñ ki nahīñ

log jo pursish-e-hāl kareñ haiñ jī to unhoñ ne khāyā hai

ho ke faqīr to vaañ baiThe haiñ rahte haiñ ashrāf jahāñ

ham ne tavakkul bahut kiyā hai nām-e-ḳhudā sarmāya hai

barsoñ ham darvesh rahe haiñ parde meñ duniyā-dārī ke

nāmūs us kī kyūñke rahe ye parda jin ne uThāyā hai

DhūñD nikālā thā jo use so aap ko bhī ham kho baiThe

jaisā nihāl lagāyā ham ne vaisā hī phal paayā hai

'mīr'-e-ġharīb se kyā ho mu’āriz goshe meñ is vaadī ke

ek diyā sā bujhtā un ne dāġh-e-jigar pe jalāyā hai

ahd-e-junun hai mausam gul ka aur shagufa laya hai

abr-e-bahaari wadi se uTh kar aabaadi par aaya hai

sun kar mere shor-e-shab ko jhunjhla kar wo kahne laga

nale is ke falak tak pahunche kin ne is ko sataya hai

dakhkhin uttar purab pachchhim hangama hai sab jagah

udham mere harf-o-suKHan ne chaaron or machaya hai

be-chashm-o-ru ho baiThe ho wajh nahin hai zahir kuchh

kaam ki surat bigDi hamari munh kyon tum ne banaya hai

zulm-o-sitam sab sahl hain us ke hum se uThte hain ki nahin

log jo pursish-e-haal karen hain ji to unhon ne khaya hai

ho ke faqir to wan baiThe hain rahte hain ashraf jahan

hum ne tawakkul bahut kiya hai nam-e-KHuda sarmaya hai

barson hum darwesh rahe hain parde mein duniya-dari ke

namus us ki kyunke rahe ye parda jin ne uThaya hai

DhunD nikala tha jo use so aap ko bhi hum kho baiThe

jaisa nihaal lagaya hum ne waisa hi phal paya hai

'mir'-e-gharib se kya ho mu’ariz goshe mein is wadi ke

ek diya sa bujhta un ne dagh-e-jigar pe jalaya hai