ai kash koi ja kar kah aawe yar se bhi

ai kaash koī jā kar kah aave yaar se bhī

yaañ kaam jā chukā hai ab iḳhtiyār se bhī

tā-chand be-dimāġhī kab tak suḳhan ḳhashin ho

koī to baat kariye iḳhlās pyaar se bhī

yak-ma.anī-e-shagufta sau rang bañdh ga.e haiñ

alvān-e-gul haiñ har-sū ab ke bahār se bhī

kyā jeb-o-āstīñ hī sailāb-ḳhez hai yaañ

dariyā bahā kareñ haiñ mere kanār se bhī

bāġh-e-vafā se ham ne paayā so phal ye paayā

siine meñ chāk-tar hai dil ab anaar se bhī

raah us kī barsoñ dekhī āñkheñ ġhubār lā.īñ

niklā na kaam apnā is intizār se bhī

jān-o-jahāñ se guzrā maiñ 'mīr' jin kī ḳhātir

bach kar nikalte haiñ ve mere mazār se bhī

ai kash koi ja kar kah aawe yar se bhi

yan kaam ja chuka hai ab iKHtiyar se bhi

ta-chand be-dimaghi kab tak suKHan KHashin ho

koi to baat kariye iKHlas pyar se bhi

yak-mani-e-shagufta sau rang bandh gae hain

alwan-e-gul hain har-su ab ke bahaar se bhi

kya jeb-o-astin hi sailab-KHez hai yan

dariya baha karen hain mere kanar se bhi

bagh-e-wafa se hum ne paya so phal ye paya

sine mein chaak-tar hai dil ab anar se bhi

rah us ki barson dekhi aankhen ghubar lain

nikla na kaam apna is intizar se bhi

jaan-o-jahan se guzra main 'mir' jin ki KHatir

bach kar nikalte hain we mere mazar se bhi