ai kash mere sar par ek bar wo aa jata

ai kaash mire sar par ik baar vo aa jaatā

Thahrāv sā ho jaatā yuuñ jī na chalā jaatā

tab tak hī tahammul hai jab tak nahīñ aatā vo

is raste nikaltā to ham se na rahā jaatā

ik aag lagā dī hai chhātī meñ judā.ī ne

vo mah gale lagtā to yuuñ dil na jalā jaatā

yā laag kī ve bāteñ yā aisī hai be-zārī

vo jo na lagā letā to maiñ na lagā jaatā

kyā nuur kā buq'a hai chehra ki shab-e-mah meñ

muñh khole jo so rahtā to maah chhupā jaatā

is shauq ne dil ke bhī kyā baat baḌhā.ī thī

ruq.a use likhte to tūmār likhā jaatā

ye hamdamī kā da.avā us ke lab-e-ḳhandāñ se

bas kuchh na chalā varna piste ko chabā jaatā

ab to na rahā vo bhī tāqat ga.ī sab dil kī

jo haal kabhū apnā maiñ tum ko sunā jaatā

vasvās na kartā thā mar jaane se hijrāñ meñ

thā 'mīr' to aisā bhī dil jī se uThā jaatā

ai kash mere sar par ek bar wo aa jata

Thahraw sa ho jata yun ji na chala jata

tab tak hi tahammul hai jab tak nahin aata wo

is raste nikalta to hum se na raha jata

ek aag laga di hai chhati mein judai ne

wo mah gale lagta to yun dil na jala jata

ya lag ki we baaten ya aisi hai be-zari

wo jo na laga leta to main na laga jata

kya nur ka buq'a hai chehra ki shab-e-mah mein

munh khole jo so rahta to mah chhupa jata

is shauq ne dil ke bhi kya baat baDhai thi

ruqa use likhte to tumar likha jata

ye hamdami ka dawa us ke lab-e-KHandan se

bas kuchh na chala warna piste ko chaba jata

ab to na raha wo bhi taqat gai sab dil ki

jo haal kabhu apna main tum ko suna jata

waswas na karta tha mar jaane se hijran mein

tha 'mir' to aisa bhi dil ji se uTha jata