اے کاش مرے سر پر اک بار وہ آ جاتا

اے کاش مرے سر پر اک بار وہ آ جاتا

ٹھہراؤ سا ہو جاتا یوں جی نہ چلا جاتا

تب تک ہی تحمل ہے جب تک نہیں آتا وہ

اس رستے نکلتا تو ہم سے نہ رہا جاتا

اک آگ لگا دی ہے چھاتی میں جدائی نے

وہ مہ گلے لگتا تو یوں دل نہ جلا جاتا

یا لاگ کی وے باتیں یا ایسی ہے بے زاری

وہ جو نہ لگا لیتا تو میں نہ لگا جاتا

کیا نور کا بقعہ ہے چہرہ کہ شب مہ میں

منہ کھولے جو سو رہتا تو ماہ چھپا جاتا

اس شوق نے دل کے بھی کیا بات بڑھائی تھی

رقعہ اسے لکھتے تو طومار لکھا جاتا

یہ ہمدمی کا دعویٰ اس کے لب خنداں سے

بس کچھ نہ چلا ورنہ پستے کو چبا جاتا

اب تو نہ رہا وہ بھی طاقت گئی سب دل کی

جو حال کبھو اپنا میں تم کو سنا جاتا

وسواس نہ کرتا تھا مر جانے سے ہجراں میں

تھا میرؔ تو ایسا بھی دل جی سے اٹھا جاتا