ajab nahin hai na jaane jo mir chah ki rit

ajab nahīñ hai na jaane jo 'mīr' chaah kī riit

sunā nahīñ hai magar ye ki jogī kis ke miit

mat in namāziyoñ ko ḳhāna-sāz-e-dīñ jaano

ki ek iiñT kī ḳhātir ye Dhāte haiñge masīt

ġham-e-zamāna se fāriġh haiñ māya-bāḳhtgāñ

qimār-ḳhāna-e-āfāq meñ hai haar hī jiit

hazār shāna-o-misvāk-o-ġhusl shaiḳh kare

hamāre 'indiye meñ to hai vo ḳhabīs palīt

kisū ke bistar-o-sanjāb-o-qasr se kyā kaam

hamārī gor ke bhī Dher meñ makāñ hai mabīt

hue haiñ suukh ke āshiq tañbūre ke se taar

raqīb dekho to gaate haiñ baiThe aur hī giit

shafaq se haiñ dar-o-dīvār zard shām-o-sahar

huā hai lakhna.ū is rahguzar meñ pīlībhīt

kahā thā ham ne bahut bolnā nahīñ hai ḳhuub

hamāre yaar ko so ab hamīñ se baat na chiit

mile the 'mīr' se ham kal kanār-e-dariyā par

fatīla-mū vo jigar-soḳhta hai jaise atiit

ajab nahin hai na jaane jo 'mir' chah ki rit

suna nahin hai magar ye ki jogi kis ke mit

mat in namaziyon ko KHana-saz-e-din jaano

ki ek inT ki KHatir ye Dhate hainge masit

gham-e-zamana se farigh hain maya-baKHtgan

qimar-KHana-e-afaq mein hai haar hi jit

hazar shana-o-miswak-o-ghusl shaiKH kare

hamare 'indiye mein to hai wo KHabis palit

kisu ke bistar-o-sanjab-o-qasr se kya kaam

hamari gor ke bhi Dher mein makan hai mabit

hue hain sukh ke aashiq tanbure ke se tar

raqib dekho to gate hain baiThe aur hi git

shafaq se hain dar-o-diwar zard sham-o-sahar

hua hai lakhnau is rahguzar mein pilibhit

kaha tha hum ne bahut bolna nahin hai KHub

hamare yar ko so ab hamin se baat na chit

mile the 'mir' se hum kal kanar-e-dariya par

fatila-mu wo jigar-soKHta hai jaise atit